Душанбе, 29 май, – АИ «Корвон Иттилоот». Дар пасманзари афзоиши хатарҳои иқлимӣ ва фишори рӯзафзун ба захираҳои об, Бонки ҷаҳонӣ дар як соли охир барои таҳкими амнияти обӣ ва баланд бардоштани устуворӣ ба тағйирёбии иқлим дар кишварҳои Осиёи Марказӣ беш аз 400 миллион доллари ИМА ҷудо намудааст.
Дар ин бора зимни Чаҳорумин конфронси байналмилалии сатҳи баланд оид ба Даҳсолаи байналмилалии амал «Об барои рушди устувор, солҳои 2018–2028» дар Душанбе коршиноси пешбари Бонки ҷаҳонӣ оид ба захираҳои об Кристина Леб хабар дод.
Ба гуфтаи ӯ, маблағгузорӣ тавассути лоиҳаҳои миллӣ дар Тоҷикистон, Ӯзбекистон ва Ҷумҳурии Қирғизистон, инчунин барномаҳои минтақавии Фонди байналмилалии наҷоти Арал амалӣ мегардад. Ин сармоягузориҳо қисми ташаббуси ҷаҳонии Бонки ҷаҳонӣ — Water Forward мебошанд, ки ба таъмини амнияти обӣ барои беш аз як миллиард нафар равона шудааст.
Дар амал, сухан дар бораи шаклгирии сатҳи нави дастгирии байналмилалии минтақа меравад, ки имрӯз ҳарчи бештар ба яке аз минтақаҳои осебпазир аз тағйирёбии иқлим табдил меёбад. Дар Осиёи Марказӣ обшавии босуръати пиряхҳо, норасоии об, таназзули замин ва афзоиши фишор ба низомҳои обии фаромарзӣ тадриҷан на танҳо мушкили экологӣ, балки таҳдиди иқтисодӣ низ мегарданд.
Маҳз ҳамин масъалаҳо меҳвари Конфронси байналмилалии Душанбе буданд, ки аз 25 то 27 май баргузор гардид. Форум вазирон, намояндагони ҳукуматҳо, созмонҳои байналмилалӣ, муассисаҳои молиявӣ, ҷомеаи илмӣ ва ҷомеаи шаҳрвандиро муттаҳид намуд.
Дар маркази муҳокимаҳо масъалаҳои тағйирёбии иқлим, идоракунии устувори захираҳои об, амнияти энергетикӣ ва мутобиқшавии иқтисод ба шароити нави табиӣ қарор доштанд.
Тавре Кристина Леб таъкид намуд, Осиёи Марказӣ яке аз минтақаҳои осебпазиртарини ҷаҳон аз нуқтаи назари норасоии об ва таъсири тағйирёбии иқлим боқӣ мемонад. Аз ин рӯ, ҳамкории фаромарзӣ ва сармоягузории муштарак ба инфрасохтори об аҳамияти калидӣ касб мекунад.
«Тақвияти ҳамкориҳои фаромарзӣ ва сармоягузорӣ ба идоракунии устувори захираҳои об барои рушди иқтисодӣ, амнияти озуқаворӣ, истеҳсоли энергия ва ҳифзи муҳити зист дар тамоми минтақа аҳамияти ҳалкунанда доранд», — изҳор дошт намояндаи Бонки ҷаҳонӣ.
Дар маҷмуъ, ниҳодҳои байналмилалии молиявӣ имрӯз масъалаи обро дар Осиёи Марказӣ ҳамчун омили стратегии суботи минтақавӣ арзёбӣ мекунанд. Барои кишварҳои минтақа захираҳои обӣ на танҳо сарчашмаи рушд, балки унсури муҳими амнияти дарозмуддат низ ба шумор мераванд.
Ҳамчунин нақши Конфронси обии Душанбе ҳамчун яке аз минбарҳои асосии байналмилалӣ барои ташаккули муколамаи ҷаҳонӣ оид ба масъалаҳои об, иқлим ва рушди устувор махсус таъкид гардид.
Бонки ҷаҳонӣ изҳор намуд, ки маҳз чунин механизмҳои байналмилалӣ имкон медиҳанд давлатҳо, донорҳо ва ҷомеаи коршиносиро атрофи роҳҳалҳои амалӣ барои муқовимат ба хатарҳои обию иқлимии асри XXI муттаҳид созанд.
Манбаи акс: НИАТ «Ховар»