Қазақстан Республикасы Сыртқы істер министрінің орынбасары Әлібек Бақаев АҚШ-тың Ауғанстандағы дипломатиялық миссиясының басшысы Карен Декермен, АҚШ-тың Қазақстандағы Елшісі Дэниел Розенблюммен және АҚШ-тың халықаралық даму агенттігінің (USAID) өкілдерімен кездесті. Кездесу Қазақстанның Сыртқы істер министрлігінде өтті.

Ауғанстандағы аймақтық қауіпсіздік пен әлеуметтік тұрақтылықты нығайту шараларына басты назар аударылды. Тараптар ел экономикасын қалпына келтіру және ауған халқының тұрмыс жағдайын жақсарту жолдарын талқылады.

Әлібек Бақаев гуманитарлық көмектің маңыздылығын атап өтіп, Қазақстан Ауғанстанға тұрақты түрде гуманитарлық көмек жіберетінін, ауған студенттерін оқытатынын және халықаралық ұйымдармен бірлескен жобаларды жүзеге асыратынын айтты. Ол сондай-ақ Қазақстанның практикалық ынтымақтастық шеңберінде Ауғанстанмен сауда-экономикалық, энергетикалық және көліктік-логистикалық байланыстарды нығайту ниетін атап өтті.

Америкалық тарап ауған халқына тұрақты қолдау көрсеткені үшін Қазақстанға алғысын білдіріп, Астананың Кабулмен экономикалық ынтымақтастықты дамыту жөніндегі күш-жігерін оң бағалады. Американдық дипломаттар Ауғанстанмен одан әрі өзара әрекеттесудің тиімді тетіктерін құру қажеттілігімен келісті.

Фото: ҚР СІМ