4-сентябрда Бишкекте Кыргыз Республикасынын Министрлер Кабинети менен Дүйнөлүк банк тарабынан уюштурулган тегерек стол болуп, анда бул маселе талкууланды.

Иш-чарага Кыргызстан, Казакстан жана Өзбекстандан келген делегаттар, эл аралык эксперттер катышты.

Министрлер кабинетинин төрагасынын орун басары, суу чарба министри Бакыт Төрөбаев жыйындын маанилүүлүгүн белгиледи:

«Бул тегерек стол Камбар-Ата ГЭС-1 долбоорунун маанилүү этабы болуп саналат. Үч өлкөнүн энергетика министрликтеринин ортосунда келишимдерге кол коюлду, бул долбоордун биримдигин жана колдоосун көрсөтөт. Биргелешкен аракеттер Борбор Азияны таза энергия менен камсыз кылып, аймактык кызматташтыкты бекемдейт”.

Даярдык иштеринин жүрүшү тууралуу Кыргызстандын энергетика министри Таалайбек Ибраев маалымат берди. Транспорттук тоннелдин курулушу аяктады, жолдорду жана электр линияларын, ошондой эле Нарын дарыясы аркылуу өтүүчү көпүрөнү куруу иштери жүрүп жатат.

Дүйнөлүк банктын жетектөөчү адиси Максуджон Сафаров долбоор алдыңкы адистердин катышуусунда даярдалып жатканын, ал эми техникалык-экономикалык негиздеме швейцариялык AFRY компаниясы тарабынан иштелип жатканын баса белгиледи.

Дамбаны тандоо боюнча чечим кабыл алынып, 2025-жылдын май айына чейин техникалык-экономикалык негиздеме даярдалат.

Сүрөт: Кыргыз Республикасынын Энергетика министрлиги