Toshkent, 2026-yil 27-iyun – Karavan Info axborot agentligi. Oʻzbekiston Prezidenti Buyuk Britaniyaning sobiq Bosh vaziri va Global oʻzgarishlar instituti raisi Toni Bler bilan uchrashdi.

Tomonlar Oʻzbekistonda amalga oshirilayotgan islohotlarni ekspertlar tomonidan qoʻllab-quvvatlovchi institut bilan kelgusidagi hamkorlikni muhokama qilishdi.

Asosiy iqtisodiy tarmoqlarda qoʻshma loyihalarni amalga oshirish, yirik strategik investorlar va yetakchi xalqaro texnologiya kompaniyalarini jalb qilish hamda zamonaviy innovatsion yechimlarni joriy etish orqali mamlakatning raqamli transformatsiyasini tezlashtirishga alohida eʼtibor qaratildi.

Toni Bler Yangi Oʻzbekistonda amalga oshirilayotgan islohotlarning koʻlami va izchilligini yuqori baholadi. Shuningdek, u Toshkent xalqaro investitsiya forumining investitsiyalarni jalb qilish, biznes aloqalarini rivojlantirish va yangi loyihalarni ilgari surish uchun samarali platforma sifatidagi ahamiyatini taʼkidladi.

Surat: Oʻzbekiston Prezidenti matbuot xizmati