Душанбе, 02 июл, – АИ «Корвон Иттилоот». Тоҷикистон ва Ӯзбекистон раванди таҳкими шарикии иқтисодиро идома дода, ҳамкории байниидоравиро дар бахши молия ба сатҳи нави сифатӣ мебароранд. Қадами навбатӣ дар ин самт ба имзо расидани Нақшаи ҳамкорӣ байни Вазорати молияи Ҷумҳурии Тоҷикистон ва Вазорати иқтисод ва молияи Ҷумҳурии Ӯзбекистон барои солҳои 2026–2027 гардид, ки ба густариши ҳамкорӣ дар самти идоракунии молияи давлатӣ, сиёсати макроиқтисодӣ ва ҷалби сармоягузорӣ нигаронида шудааст.

Санад 30 июн дар шаҳри Тошканд зимни мулоқоти Вазири молияи Ҷумҳурии Тоҷикистон Файзиддин Қаҳҳорзода бо муовини Сарвазир — Вазири иқтисод ва молияи Ҷумҳурии Ӯзбекистон Ҷамшед Қӯчқоров ба имзо расид.

Дар ҷараёни мулоқот ҷонибҳо вазъи кунунии ҳамкории дуҷонибаро дар бахшҳои иқтисод, молия, савдо ва сармоягузорӣ мавриди баррасӣ қарор дода, инчунин доир ба самтҳои нави ҳамкорӣ байни ниҳодҳои молиявии ду кишвар табодули афкор анҷом доданд. Таваҷҷуҳи махсус ба такмили низоми идоракунии молияи давлатӣ, мубодилаи таҷрибаи касбӣ ва таҳкими ҳамкории институтсионалӣ зоҳир гардид.

Файзиддин Қаҳҳорзода ба ҷониби Ӯзбекистон маълумоти муфассал оид ба нишондиҳандаҳои асосии макроиқтисодии Тоҷикистон ва раванди ислоҳоти сохторӣ дар низоми идоракунии молияи давлатӣ пешниҳод намуд. Зикр гардид, ки ислоҳоти амалишаванда ба баланд бардоштани самаранокии сиёсати буҷетӣ, таҳкими устувории молиявӣ ва фароҳам овардани замина барои рушди устувори иқтисодӣ равона шудаанд.

Дар мулоқот таъкид гардид, ки таҳкими ҳамкории Тоҷикистону Ӯзбекистон ба шарофати иродаи сиёсии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва Президенти Ҷумҳурии Ӯзбекистон муҳтарам Шавкат Мирзиёев ба марҳилаи нави рушд ворид гардидааст. Дар солҳои охир муносибатҳои ду кишвар хусусияти воқеан стратегӣ касб намуда, ҳамкории иқтисодӣ ба яке аз омилҳои муҳими рушди минтақаи Осиёи Марказӣ табдил ёфтааст.

Ба андешаи коршиносон, густариши ҳамкорӣ байни мақомоти молиявии ду давлат барои ҳамоҳангсозии сиёсати макроиқтисодӣ, рушди савдои мутақобила, ҷалби сармоягузорӣ ва татбиқи лоиҳаҳои муштараки зерсохторӣ имкониятҳои нав фароҳам меорад.

Дар шароити афзоиши ҳамгироии иқтисодии кишварҳои Осиёи Марказӣ чунин санадҳо барои ташаккули фазои устувори иқтисодии минтақа аҳаммияти стратегӣ доранд.

Акс: Вазорати молияи Ҷумҳурии Тоҷикистон