Душанбе, 23 июл, – АИ «Корвон Иттилоот». Дар вилояти Суғд мулоқоти роҳбарияти вилояти Суғд ва вилояти Ботканди Ҷумҳурии Қирғизистон баргузор гардид, ки идомаи таҳкими ҳамкориҳои наздисарҳадӣ ва густариши робитаҳои амалӣ миёни минтақаҳои ду кишвар арзёбӣ мешавад. Ин музокирот дар заминаи беҳтар гардидани муносибатҳои Тоҷикистону Қирғизистон ва иҷрои тавофуқоти дар сатҳи олӣ ҳосилшуда баргузор шуд.

Бо сафари корӣ ба вилояти Суғд ваколатдори Президенти Ҷумҳурии Қирғизистон дар вилояти Ботканд Мамирҷон Раҳимов ташриф овард. Дар шаҳри Гулистон ӯро Раиси вилояти Суғд Раҷаб Аҳмадзода ба ҳузур пазируфт.

Раиси вилояти Суғд зимни истиқболи ҳайати меҳмонон таъкид намуд, ки бо шарофати сиёсати хирадмандона ва иродаи сиёсии Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Қирғизистон муҳтарам Садир Жапаров муносибатҳои дӯстона ва ҳамсоягии неки ду давлат ба марҳилаи нави рушд ворид гардидаанд.

Дар мулоқот аҳамияти таърихии Эъломияи Хуҷанд оид ба дӯстии абадӣ, ки 31 марти соли 2025 аз ҷониби сарони давлатҳои Тоҷикистон, Қирғизистон ва Ӯзбекистон ба имзо расида буд, махсус таъкид гардид. Ҳамчунин ифтитоҳи стеллаи рамзӣ дар нуқтаи пайванди сарҳадҳои давлатии се кишвар ҳамчун заминаи устувори таҳкими сулҳу субот, эътимоди мутақобила ва рушди ҳамкориҳои минтақавӣ арзёбӣ шуд.

Раҷаб Аҳмадзода изҳор дошт, ки вилояти Суғд дар доираи татбиқи ҳадафҳои стратегии мамлакат ва омодагӣ ба ҷашни 35-солагии Истиқлоли давлатии Ҷумҳурии Тоҷикистон босуръат рушд намуда, дар шаҳру ноҳияҳои он садҳо корхонаҳои нави истеҳсолӣ ба истифода дода шудаанд. Маҳсулоти ин корхонаҳо хусусияти воридотивазкунанда ва содиротӣ дошта, дар рушди иқтисоди миллӣ саҳми назаррас мегузоранд.

Ба гуфтаи ӯ, мавқеи ҷуғрофӣ ва шароити якхелаи иқлимии вилояти Суғд ва вилояти Ботканд имкониятҳои васеъ барои густариши ҳамкорӣ дар бахшҳои кишоварзӣ, саноат, таъсиси корхонаҳои муштарак, коркарди маҳсулоти кишоварзӣ ва дигар самтҳои афзалиятнок фароҳам меорад.

Дар навбати худ ваколатдори Президенти Ҷумҳурии Қирғизистон дар вилояти Ботканд Мамирҷон Раҳимов барои истиқболи самимӣ изҳори сипос намуда, гуфт, ки ин сафар бо дастури роҳбарияти Қирғизистон ва бо мақсади таҳкими робитаҳои байнивилоятӣ ва роҳандозии ташаббусҳои нави иқтисодӣ анҷом дода мешавад.

Ӯ омодагии вилояти Боткандро барои густариши ҳамкорӣ бо вилояти Суғд дар соҳаҳои саноат, кишоварзӣ, чорводорӣ, сайёҳӣ, тандурустӣ, варзиш ва содироти маҳсулоти кишоварзӣ таъкид намуд.

Дар ҷараёни мулоқоти васеъ бо иштироки намояндагони сохторҳои давлатӣ ва доираҳои соҳибкорӣ масъалаҳои рушди ҳамкориҳои тиҷоративу иқтисодӣ, татбиқи лоиҳаҳои муштарак, мубодилаи таҷриба, афзоиши гардиши молу маҳсулот ва иҷрои дастуру супоришҳои сарони давлатҳо баррасӣ гардиданд.

Дар анҷоми мулоқот ҷонибҳо омодагии худро барои таҳкими минбаъдаи ҳамкориҳои мутақобилан судманд миёни вилояти Суғд ва вилояти Ботканд тасдиқ намуда, ба сохторҳои дахлдор ҷиҳати таҳияи нақшаҳои мушаххаси ҳамкорӣ ва татбиқи амалии созишҳои ҳосилшуда супоришҳои зарурӣ доданд.

Тақвияти ҳамкориҳои мустақими вилояти Суғд ва вилояти Ботканд нишон медиҳад, ки муносибатҳои Тоҷикистону Қирғизистон аз марҳилаи эътидолсозии сиёсӣ ба марҳилаи ҳамкориҳои фаъоли иқтисодии байни минтақаҳо ворид мешаванд.

Амалӣ гардидани лоиҳаҳои муштарак, рушди истеҳсолот ва тавсеаи савдои наздисарҳадӣ метавонад минтақаҳои ҳамсарҳадро ба марказҳои нави рушди иқтисодӣ табдил дода, барои соҳибкорон ва аҳолии ҳар ду кишвар имкониятҳои нави рушд фароҳам оварад.

АКС: Хадамоти матбуоти Раиси вилояти Суғд.