Душанбе, 11 август, – АИ «Корвон Иттилоот».  Бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон бахшида ба Рӯзи варзишгарони Тоҷикистон ҳамоиши тантанавии фарҳангию фароғатӣ ва варзишию солимгардонӣ таҳти унвони «Варзиш — пайки сулҳ, дӯстӣ ва созандагӣ» баргузор гардид.

Дар чорабинӣ Раиси Кумитаи кор бо ҷавонон ва варзиш Зулфиқор Гулаҳмадзода ва Муовини якуми Раиси Ҳизби Халқии Демократии Тоҷикистон Маликашоҳ Неъматзода иштирок намуда, варзишгарон, мураббиён, собиқадорони соҳа ва дигар иштирокчиёнро ба муносибати Рӯзи варзишгарони Тоҷикистон табрик карданд.

Зимни суханрониҳо таъкид гардид, ки бо дастгирии пайвастаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои рушди тарбияи ҷисмонӣ ва варзиш, тарғиби тарзи ҳаёти солим ва оммавигардонии машғулиятҳои варзишӣ тадбирҳои муассир амалӣ мешаванд.

Дар ин замина, фароҳам овардани шароити мусоид барои ҷавонон ва рушди инфрасохтори варзишӣ ба яке аз самтҳои муҳими сиёсати иҷтимоӣ табдил ёфтааст. Варзиш на танҳо воситаи таҳкими саломатии аҳолӣ, балки омили тарбияи ҷавонон дар рӯҳияи ватандӯстӣ, таҳкими ваҳдату дӯстӣ ва муаррифии шоистаи Тоҷикистон дар арсаи байналмилалӣ арзёбӣ гардид.

Дар идомаи ҳамоиш барномаи фарҳангии пурмуҳтаво бо иштироки ҳунармандони маъруфи кишвар пешкаши ҳозирин гардид. Намоиши маҳорати варзишгарон ва баромадҳои гурӯҳҳои ҳунарӣ ба чорабинӣ рӯҳияи тантанавӣ бахшида, фазои идонаро боз ҳам ғанӣ гардонд.

Ҳамзамон, як қатор собиқадорони соҳаи тарбияи ҷисмонӣ ва варзиш, мураббиёни соҳибтаҷриба, варзишгарони номдор, инчунин ғолибону ҷоизадорони мусобиқаҳои ҷумҳуриявӣ ва байналмилалӣ барои саҳми арзанда дар рушди соҳа ва тарғиби тарзи ҳаёти солим бо дипломҳо, сипосномаҳо ва туҳфаҳои хотиравии Кумитаи кор бо ҷавонон ва варзиш қадрдонӣ шуданд.

Густариши чорабиниҳои оммавии варзишӣ ва пайвастани онҳо бо барномаҳои фарҳангӣ нишон медиҳад, ки варзиш дар Тоҷикистон тадриҷан ба воситаи муҳими таҳкими ҳамбастагии иҷтимоӣ ва ташаккули фарҳанги солими ҷомеа табдил меёбад.

Баргузории чунин ҳамоишҳо барои ҷалби ҷавонон ба фаъолияти варзишӣ, дастгирии варзишгарони касбӣ ва ҳавасмандсозии насли нав ба дастовардҳои байналмилалӣ замина фароҳам меорад. Дар баробари ин, қадрдонии собиқадорон ва қаҳрамонони варзиш ба нигоҳ доштани пайванди наслҳо ва таҳкими мактаби миллии варзиш мусоидат мекунад.

Дар фарҷоми ҳамоиш иштирокчиён Рӯзи варзишгарони Тоҷикистонро дар фазои дӯстиву ҳамбастагӣ ва бо эҳсоси баланди ифтихори миллӣ таҷлил намуда, ба варзишгарони кишвар дар мусобиқаҳои минбаъда комёбиҳои боз ҳам бештар орзу карданд.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон