Душанбе, 14 август, – АИ «Корвон Иттилоот». 20–21 августи соли 2026 дар пойтахти Тоҷикистон Нахустин Форуми байналмилалии саноати ғизоӣ баргузор мегардад. Ин чорабинӣ намояндагони соҳибкорӣ, сармоягузорон, истеҳсолкунандагон, коршиносон ва шарикони байналмилалиро муттаҳид намуда, ба майдони муколама оид ба рушди соҳа, ҷалби сармоя ва васеъ намудани имкониятҳои содиротӣ табдил меёбад.
20 август форум дар меҳмонхонаи Hyatt Regency Dushanbe доир мешавад. Дар барнома — муҳокимаҳои панелӣ, сессияи сармоягузорӣ, муаррифии технологияҳои нав, вохӯриҳои B2B ва баррасии дурнамои ҳамкории байналмилалӣ пешбинӣ шудааст. Иштирокчиён метавонанд таҷрибаро мубодила кунанд, лоиҳаҳои худро пешниҳод намоянд ва ташаббусҳои муштаракро муайян созанд.
21 август майдони чорабинӣ Dushanbe Expo хоҳад буд. Дар ин ҷо намоишгоҳи маҳсулот ва ҳалли муосири саноати ғизоӣ густариш меёбад, ки дар он ширкатҳо имкон пайдо мекунанд маҳсулот ва технологияҳои худро ба доираи васеи мутахассисон ва шарикони эҳтимолӣ муаррифӣ намоянд.
Ташкилкунандагон таъкид мекунанд, ки иштирок дар форум имкониятҳои мушаххас фароҳам меорад: муаррифии маҳсулоти худ, барқарор намудани робитаҳои нави тиҷоратӣ, ёфтани сармоягузорон ва шарикон, инчунин васеъ намудани ҳузур дар бозорҳои нав.
Аз нуқтаи назари таҳлилӣ баргузории Нахустин Форуми байналмилалии саноати ғизоӣ барои Тоҷикистон аҳамияти стратегӣ дорад. Соҳа дорои иқтидори назарраси рушд — аз коркарди ашёи хоми кишоварзӣ то истеҳсоли маҳсулоти тайёр бо арзиши иловашудаи баланд — мебошад.
Дар шароити афзоиши талабот ба маҳсулоти сифатнок ва аз ҷиҳати экологӣ тоза дар бозорҳои минтақавӣ ва ҷаҳонӣ чунин майдонҳо барои бунёди занҷираҳои устувори ҳамкорӣ, ҷалби технологияҳо ва сармоя, инчунин таҳкими мавқеи истеҳсолкунандагони тоҷик мусоидат мекунанд.
Форум раванди умумии гуногунсамтгардонии иқтисод, рушди комплекси агросаноатӣ ва фаъолона ворид шудани кишвар ба робитаҳои байналмилалии иқтисодиро инъикос менамояд. Барои соҳибкорӣ ин фурсати худмуаррифӣ, барои сармоягузорон — имконияти арзёбии дурнамои яке аз соҳаҳои динамикии Осиёи Марказӣ мебошад.
Акс: Вазорати саноат ва технологияҳои нави Ҷумҳурии Тоҷикистон