Қытай Ғылым академиясының президенті Хоу Цзянго Қазақстан Республикасы Президенті жанындағы Ұлттық ғылым академиясының президенті Ақылбек Күрішбаевпен және Әл-Фараби атындағы Қазақ ұлттық университетінің ғылыми-зерттеу және инновация жөніндегі проректоры Марғұлан Ибраимовпен кездесті.

Қытайдағы кездесу барысында тараптар академиялық өзара іс-қимылдан нақты бірлескен ғылыми және технологиялық жобаларды жүзеге асыруға көшу мәселесін талқылады.

Келіссөздерден кейін ынтымақтастықтың төрт басым бағыты анықталды. Оларға Қытай-Орталық Азия спутниктік желісін құру, жасанды интеллект пен ғылымға арналған DeepBas платформасын дамыту, ядролық физика мен энергетика саласында бірлескен зерттеулер жүргізу және Алатау қаласы жобасы аясында ғылыми-технологиялық серіктестікті нығайту кіреді.

Бүгінгі таңда Әл-Фараби атындағы Қазақ ұлттық университеті Қытай Ғылым академиясымен және жетекші Қытай университеттерімен ынтымақтастықты белсенді түрде дамытуда.

Қазіргі уақытта университетте қытайлық серіктестермен бірлескен зерттеу орталықтары мен зертханалары құрылып, жұмыс істеп тұр. Спутниктік желіні дамыту аясында ҚазҰУ Қытайдың Солтүстік-батыс политехникалық университетімен бірлесіп, ғарышқа микроспутник ұшырды. Қазақстандық университеттер үшін бұл ҚазҰУ жүзеге асырған алғашқы осындай жоба болды. Бұл ынтымақтастық ғарышты зерттеу, жоғары білікті мамандарды даярлау және спутниктерді әзірлеу үшін жаңа мүмкіндіктер ашады.

Сонымен қатар, Қазақстан-Қытай бірлескен қашықтықтан зондтау технологиялары мен қолданбалары зертханасының ғалымдары қашықтықтан зондтау технологияларын қолдана отырып, су тапшылығы, құрғақшылық және жердің тозуы сияқты қоршаған орта мәселелерін бақылайды.

Сондай-ақ, университет қытайлық компаниямен бірлесіп, пилотсыз ұшу аппараттарының үлгілерін әзірлеуге арналған оқу-өндірістік зертханасын құрды.

ҚазҰУ Орталық Азиядағы ең қуатты суперкомпьютерлік орталықтардың бірін басқарады. Бұл жоғары технологиялық жүйе жасанды интеллект, мұнай және газ, энергетика, ауыл шаруашылығы, Жерді қашықтықтан зондтау және 3D модельдеу сияқты салаларда күрделі есептеу тапсырмаларын орындау және деректерді өңдеу үшін қолданылады.

Кездесу қорытындысы бойынша Ақылбек Күрішбаев пен Хоу Цзяньго ынтымақтастықтың төрт басым бағыты бойынша жауапты үйлестірушілерді анықтауға және оларды егжей-тегжейлі әзірлеу үшін бірлескен жұмыс тобын құруға келісті.

Дереккөз: Әл-Фараби атындағы Қазақ ұлттық университетінің баспасөз қызметі