Душанбе, 16 сентябр, – АИ «Корвон Иттилоот». Зиёда аз 60 нафар намояндагони Тоҷикистон дар Фестивали байналмилалии ҷавонон, ки 11 сентябр дар Екатеринбург оғоз ёфт, иштирок доранд. Ҳайат бо кайфияти хуб омада, омода аст фарҳанги миллиро дар майдонҳои форум муаррифӣ намояд.

Тавре директори ҶДММ «Сомониён» Додихудо Шарифзода хабар дод, иштирокчиён на танҳо кишвари худро муаррифӣ кардан, балки робитаҳо бо Русияро таҳким бахшидан мехоҳанд. Дар нақша — имзои меморандум бо дирексияи фестивал ва Россотрудничество. Ба гуфтаи Шарифзода, ин имкон медиҳад, ки шумораи бештари ҷавонони фаъоли Тоҷикистон дар оянда дар чунин чорабиниҳо иштирок кунанд.

Дар ҷараёни чорабиниҳо намояндагони Тоҷикистон бо намояндагони муассисаҳои таҳсилоти олии касбӣ, ташкилотҳои ҷавонон ва ҷавонони фаъоли кишварҳои гуногун мулоқот намуда, доир ба самтҳои гуногуни ҳамкориҳои байналмилалӣ табодули таҷриба менамоянд.

Фестивал таҳти шиори «Орзуро пайравӣ кун. Якҷо бо Русия» баргузор гардида, ба таҳкими ҳамкориҳои байналмилалии ҷавонон ва фароҳам овардани заминаҳои мусоид барои табодули таҷриба дар соҳаҳои маориф, илм, технология, соҳибкорӣ, фарҳанг, варзиш ва рақамикунонӣ равона шудааст.

Ҳамзамон, аз 18 то 23 сентябри соли 2026 Барномаи минтақавӣ баргузор мегардад, ки дар он намояндагони Донишгоҳи миллии Тоҷикистон низ иштироки фаъол хоҳанд дошт.

Фестивал то 17 сентябр идома ёфта, 10 ҳазор иштирокчиро аз 191 кишвар ҷамъ овардааст. Бори аввал дар таърихи ҳаракати фестивалӣ шумораи дархостҳои хориҷиён аз анкетаҳои русҳо 32 ҳазор зиёдтар шуд — дар маҷмуъ ташкилкунандагон зиёда аз 113 ҳазор дархост гирифтанд.

Анъанавӣ дар форум ҷавонони кишварҳои фазои пасошӯравӣ васеъ намояндагӣ шудаанд — зиёда аз 1 000 нафар. Аз рӯи шумораи намояндагон низ Аргентина, Бразилия, Ҳиндустон, Чин, Мексика ва Арабистони Саудӣ пешсафанд.

Майдони асосӣ маркази байналмилалии намоишгоҳии «Екатеринбург-Экспо» гардид ва иштирокчиён дар кампуси Донишгоҳи федералии Урал ҷойгир шудаанд. Барнома мубоҳисаҳо, TED-лексияҳо, тренд-баттлҳо, чорабиниҳои фарҳангӣ ва варзиширо дар бар мегирад. Трек алоҳида барои наврасони аз 14 то 17-сола ташкил шудааст — дар он ҳазор нафар аз 99 кишвар иштирок доранд.

Иштироки ҳайати Тоҷикистон дар Фестивали байналмилалии ҷавонон – 2026 қадами муҳим дар самти таҳкими ҳамкориҳои байналмилалии ҷавонон, рушди робитаҳои илмӣ, таълимӣ ва фарҳангӣ, инчунин ба роҳ мондани робитаҳои нав бо муассисаҳои таҳсилоти олии касбӣ, ниҳодҳои илмӣ ва фарҳангии кишварҳои гуногун ба ҳисоб меравад.

Акс: https://ria.ru/