Душанбе, 21 сентябр, – АИ «Корвон Иттилоот». Намояндагии Ҷумҳурии Тоҷикистон дар Бозиҳои Осиёии соли 2026 дар Ҷопон танҳо бо варзишгарон маҳдуд намешавад.
Яке аз маъруфтарин мутахассисони таҷрибадори тоҷик дар атлетикаи сабуки ҷаҳонӣ Вадим Нигматов ба вилояти Айти ва шаҳри Нагоя сафар мекунад, то дар ҳайати ҳакамони апеллятсионии (ҷурии эътирозӣ) мусобиқаҳои байналмилалӣ фаъолият намояд.
Барои мутахассиси тоҷик ин панҷумин Бозиҳои Осиёӣ дар фаъолияти байналмилалии ӯ мебошад. Вадим Нигматов дарозмуддат аст, ки дар мусобиқаҳои бузургтарини ҷаҳонӣ кор мекунад: ӯ ҳамчун директори мусобиқаҳои Ассотсиатсияи атлетикаи сабуки Аврупо фаъолият дорад, бо World Athletics ва FISU ҳамкории зич дорад ва дар омодасозии стартҳои бузурги ҷаҳонӣ фаъолона иштирок мекунад.
Дар мусоҳиба бо воситаҳои ахбори омма Вадим Нигматов оид ба фаъолияти гуногунҷанбаи худ ва фарогирии ҷуғрофии корҳояш хабар дод. Дар соли 2026 ӯ ҳамчун директори мусобиқаҳои Ассотсиатсияи атлетикаи сабуки Аврупо чемпионати Аврупоро дар Бирмингем роҳбарӣ намуд. Илова бар ин, дар силсиламусобиқаҳои «Лигаи алмосӣ» дар Осло ва лоиҳаи нави World Athletics Ultimate Championships дар Будапешт фаъолият кард.
Ҳамчун раиси кумитаи техникии FISU ӯ ба омодасозии Бозиҳои ҷаҳонии донишҷӯёни соли 2027 дар Кореяи Ҷанубӣ ва соли 2029 дар ИМА кӯмак мерасонад.
Бо ташаббуси ӯ кросси атлетикаи сабук бори аввал ба барномаи Бозиҳои зимистонаи донишҷӯёни соли 2027 дар Чин ворид карда шуд. Шӯрои World Athletics Вадим Нигматовро ба ҳайси делегати техникӣ дар Бозиҳои Олимпии соли 2028 дар Лос-Анҷелес (ИМА) тасдиқ намуд. Ин чаҳорумин Бозиҳои Олимпӣ дар фаъолияти ӯ (пас аз Рио-2016, Токио-2020 ва Париж-2024) хоҳад буд.
Вадим Нигматов аллакай дар Бозиҳои Осиёӣ иштирок кардааст: соли 2010 дар Гуанчжоу (Чин) ва соли 2014 дар Инчхон (Кореяи Ҷанубӣ) — ҳамчун ҳаками байналмилалӣ, соли 2018 дар Ҷакарта (Индонезия) ва соли 2023 дар Ханчжоу (Чин) — ҳамчун намояндаи техникӣ. Соли 2026 дар Айти-Нагоя ӯ ба ҳайати ҷурии апеллятсионӣ ворид мешавад.
Раванди касбии Нигматов қариб бист сол пеш оғоз ёфтааст. Ӯ фарзанди мураббии шинохтаи тоҷик Ғайрат Нигматов буда, кӯдакиаш дар варзишгоҳи ба номи Фрунзеи шаҳри Душанбе гузаштааст.
Нигматов бо фаъолияти давандагӣ (800 метр) машғул шуда, баъдан ба ҳайси мураббӣ ва мутахассиси Федератсияи миллии атлетикаи сабуки Тоҷикистон фаъолият намуд. Дар соли 2006 (дар синни 22-солагӣ) дараҷаи ҳакамии байналмилалӣ гирифта, соли 2013 имтиҳонҳоро ба сатҳи олии байналмилалӣ супорид. Аз соли 2013 инҷониб ӯ дар Швейтсария макон гирифта, тамоми донишу таҷрибаи худро ба рушди атлетикаи сабуки ҷаҳонӣ бахшидааст.
Мавқеи баланди Вадим Нигматов дар сохторҳои ҷаҳонии варзиш намунаи барҷастаи муваффақияти мактаби варзишии Тоҷикистон ва муаррифии сазовори кишвар дар сатҳи олии байналмилалӣ мебошад.
Акс: Аз бойгонии шахсии В. Нигматов. Маросими ҷоизасупорӣ. Вадим Нигматов бо дабири кулли Ассотсиатсияи Осиёии варзиши сабук.