Душанбе / Хуҷанд, 24 сентябр — АИ «Корвон Иттилоот». Президенти Ҷумҳурии Тоҷикистон, Пешвои миллат Эмомалӣ Раҳмон шоми 23 сентябр дар шаҳри Хуҷанд дар чорабинии тантанавӣ бахшида ба 35-солагии Истиқлоли давлатии Ҷумҳурии Тоҷикистон иштирок намуда, суханронӣ кард.
Дар маркази суханронии ӯ аҳамияти истиқлол барои давлат ва ҷомеа, натиҷаҳои рушди иҷтимоию иқтисодии вилояти Суғд ва вазифаҳои минбаъда ҷиҳати ҳифзи дастовардҳои бадастомада қарор доштанд.
Президент иштирокчиён ва меҳмонони шоми фарҳангии идонаро ба муносибати 35-солагии Истиқлоли давлатӣ табрик намуда, истиқлолу озодиро арзишҳои муҳимтарин ва дастоварди бузурги миллати тоҷик арзёбӣ кард. Ба гуфтаи ӯ, маҳз ба шарофати истиқлол барои таҳкими давлатдории миллӣ, эҳёи суннатҳои бостонӣ ва арзишҳои миллӣ, инчунин таъмини мавқеи шоистаи Тоҷикистон дар арсаи байналмилалӣ замина фароҳам гардид.
Эмомалӣ Раҳмон таъкид намуд, ки дар 35 соли истиқлол дар кишвар, аз ҷумла дар вилояти Суғд, ҳаҷми бузурги корҳои созандагӣ ва татбиқи лоиҳаҳои инфрасохторӣ анҷом дода шудааст. Танҳо дар панҷ соли охир, дар давраи омодагӣ ба таҷлили 35-солагии Истиқлоли давлатӣ, дар шаҳру ноҳияҳои вилоят 15 ҳазору 400 иншооти иҷтимоӣ ва истеҳсолӣ бунёд, навсозӣ ва ба истифода дода шудааст, ки нисбат ба нақшаи тасдиқшуда 3400 иншоот зиёд мебошад.
Сарвари давлат зимни суханронӣ дар бораи дастгирии давлатӣ аз минтақа зикр намуд, ки дар солҳои истиқлол Ҳукумати кишвар барои рушди соҳаҳои гуногуни иқтисодиёти вилоят, ҳалли масъалаҳои иҷтимоӣ ва баланд бардоштани сатҳу сифати зиндагии аҳолӣ тадбирҳои заруриро амалӣ кардааст.
Ба гуфтаи Президенти кишвар, рушди саноати сабук, маҷмааи сӯзишвориву энергетикӣ, истихроҷ ва коркарди канданиҳои фоиданок, металлургия ва истеҳсоли масолеҳи сохтмон дар вилояти Суғд ба рушди устувори иқтисоди миллӣ мусоидат мекунад.
Ба рушди инфрасохтори нақлиётӣ низ таваҷҷуҳи махсус зоҳир гардид. Президенти кишвар татбиқи лоиҳаҳои бузург, аз ҷумла сохтмони нақбҳои ҳаётан муҳими «Истиқлол» ва «Шаҳристон», инчунин таҷдиди роҳҳои автомобилгарди Душанбе — Чаноқ ва Айнӣ — Панҷакент-ро омили муҳими раҳоӣ аз бунбасти коммуникатсионӣ арзёбӣ намуд.
Эмомалӣ Раҳмон таъкид кард, ки дар шароити мураккаби ҷаҳони муосир ҳифзи дастовардҳои истиқлоли давлатӣ, таҳкими субот ва ваҳдати миллӣ, инчунин таъмини амнияти кишвар аз ҳар як шаҳрванди ватандӯст, бахусус ҷавонон, масъулияти баланд ва талоши доимиро тақозо мекунад.
Президент ба ҳисси баланди масъулияти миллӣ ва меҳнатдӯстии сокинони вилояти Суғд изҳори боварӣ намуда, зарурати идомаи корҳои муштаракро барои рушди минбаъда ва таҳкими кишвар таъкид кард.
Пас аз суханронии Сарвари давлат барномаи консертӣ бо иштироки устодони санъати Тоҷикистон ва ҳунармандони вилояти Суғд баргузор гардид. Дар он сурудҳо ва барномаҳои мусиқию рақсӣ бахшида ба Ватан, Истиқлоли давлатӣ, Ваҳдати миллӣ ва дигар арзишҳои миллӣ пешниҳод шуданд.
Таҳиягарони барномаи идона бо истифода аз имкониятҳои санъати суруд, мусиқӣ ва рақс дастовардҳои асосии даврони истиқлол, инчунин мавзӯъҳои сулҳу субот, ваҳдат ва рушди Тоҷикистонро инъикос намуданд.
АКС: Хадамоти матбуоти Президенти Ҷумҳурии Тоҷикистон