Душанбе, 26 сентябр, – АИ «Корвон Иттилоот». Дар Душанбе конфронси байналмилалии илмӣ-амалӣ бахшида ба эътирофи «Ромит» ҳамчун нахустин резервати биосферии Тоҷикистон ва дурнамои ҳифзи мероси табиии кишвар баргузор гардид. Дар чорабинӣ намояндагони мақомоти давлатӣ, созмонҳои байналмилалӣ, ҷомеаи илмӣ ва коршиносӣ, инчунин воситаҳои ахбори омма иштирок намуданд.

Конфронс таҳти унвони «Мавзеъҳои Тоҷикистон дар феҳристҳои ЮНЕСКО: эътирофи “Ромит” ҳамчун нахустин резервати биосферии кишвар ва дурнамои ҳифзи мероси табиӣ» 25 сентябр дар толори «Сомонӣ»-и меҳмонхонаи Hilton Dushanbe баргузор шуд. Ташкилкунандагони он Кумитаи ҳифзи муҳити зисти назди Ҳукумати Ҷумҳурии Тоҷикистон ва Дафтари минтақавии ЮНЕСКО дар Алмато мебошанд.

Дар кори конфронс зиёда аз 80 нафар, аз ҷумла намояндагони вазорату идораҳо, созмонҳои байналмилалӣ, коршиносон, муҳаққиқон ва намояндагони воситаҳои ахбори омма иштирок карданд.

Мавзуи асосии чорабинӣ эътирофи «Ромит» ҳамчун нахустин резервати биосферии Тоҷикистон дар соли 2025 буд. Ин мақоми байналмилалӣ дар заминаи тавсеаи ҳамкориҳо дар самти ҳифзи табиат, нигоҳдории гуногунии биологӣ ва татбиқи принсипҳои рушди устувор баррасӣ гардид.

Дар доираи конфронс масъалаҳои ҳифзи гуногунии биологӣ, нигоҳдории намудҳои нодиру эндемикӣ, идоракунии самараноки резерватҳои биосферӣ, баланд бардоштани маърифати экологӣ ва ҷалби бештари ҷомеаҳои маҳаллӣ ба равандҳои ҳифзи табиат мавриди баррасӣ қарор гирифтанд.

Дар барномаи чорабинӣ ба табодули таҷрибаи байналмилалӣ низ таваҷҷуҳи хосса дода шуд. Намояндагони кишварҳои гуногун таҷрибаи идоракунии мавзеъҳои табииро муаррифӣ намуда, равишҳои таҳкими амнияти экологиро баррасӣ карданд. Чунин формат имконият медиҳад, ки таҷрибаи миллӣ бо равишҳои байналмилалии ҳифзи экосистемаҳои табиӣ муқоиса ва такмил дода шавад.

Идомаи кори конфронс 26 сентябр бо сафари шиносоӣ ба резервати биосферии «Ромит» пешбинӣ шудааст. Зимни сафар масъалаҳои амалии идоракунии резерват ва ҳифзи маҷмааҳои табиии он баррасӣ хоҳанд шуд.

Эътирофи «Ромит» ҳамчун резервати биосферӣ бахше аз талошҳои васеътари Тоҷикистон барои ҳифзи мавзеъҳои нодири табиӣ ва гуногунии биологӣ ба ҳисоб меравад. Барои кишвар ин ҳамзамон имконияти густариши ҳамкории байналмилалии илмӣ ва коршиносӣ дар соҳаи ҳифзи муҳити зистро фароҳам меорад.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон