Душанбе, 30 сентябр, — АИ «Корвон Иттилоот». Аз 5 то 9 октябр дар шаҳри Душанбе Бозиҳои XX Делфии ҷавонони кишварҳои аъзои Иттиҳоди Давлатҳои Мустақил баргузор мешаванд. Озмуни байналмилалии эҷодӣ намояндагони ҷавони 9 кишварро ба ҳам оварда, онҳо дастовардҳои худро дар самтҳои гуногуни санъат муаррифӣ хоҳанд кард.

Иштирокдорони озмун аз рӯйи номинатсияҳои «Фортепиано», «Скрипка», «Санъати тасвирӣ», «Созҳои нафасӣ», инчунин сарояндагии академӣ, анъанавӣ ва эстрадӣ ва рақси халқӣ маҳорати худро намоиш медиҳанд.

Ҳадафҳои асосии баргузории Бозиҳои Делфӣ дарёфти истеъдодҳои ҷавон, дастгирии фаъолияти эҷодии онҳо, рушди завқи зебоишиносӣ ва тарғиби арзишҳои фарҳангии миллӣ мебошанд.

Тоҷикистон ин навбат бори дуюм Бозиҳои Делфии ҷавонони кишварҳои аъзои ИДМ-ро баргузор мекунад. Бори аввал кишвар Бозиҳои XVI Делфиро 14–18 октябри соли 2022 дар шаҳри Душанбе қабул карда буд.

Дар он чорабинӣ тақрибан 500 ҷавони аз 10 то 25-сола аз кишварҳои Иттиҳод иштирок намуда, барномаи озмунӣ ва фестивалӣ номинатсияҳои фортепиано, скрипка, санъати тасвирӣ, сарояндагии академӣ, халқӣ ва эстрадӣ, рақси халқӣ, созҳои халқӣ ва нафасӣ, инчунин ҳунарҳои бадеиро дар бар мегирифт.

Баргузории Бозиҳои XX Делфӣ дар Душанбе идомаи анъанаи ҳамкории байналмилалии эҷодии ҷавонони кишварҳои ИДМ мебошад, ки соли 2022 оғоз гардида буд. Барномаи имсола низ намояндагони соҳаҳои гуногуни санъатро ба ҳам оварда, барои муоширати касбӣ ва эҷодии ҷавонон замина фароҳам хоҳад овард.

АКС: Маркази матбуоти Вазорати фарҳанги Ҷумҳурии Тоҷикистон