Душанбе, 02 октябр — АИ «Корвон Иттилоот».Лоиҳаи минтақавии энергетикии CASA-1000, ки барои пайваст кардани системаҳои энергетикии Осиёи Марказӣ ва Ҷанубӣ равона шудааст, ба марҳилаи ниҳоии амалишавӣ ворид мегардад. 1 октябри соли 2026 дар шаҳри Душанбе мулоқоти муҳими Вазири энергетика ва захираҳои оби Ҷумҳурии Тоҷикистон Далер Ҷумъа бо директори иҷроияи ширкати давлатии энергетикии Афғонистон Da Afghanistan Breshna Sherkat (DABS) Абдулҳақ Ҳамкор баргузор шуд.
Мавзӯи асосии музокирот рафти корҳои сохтмонӣ дар қитъаи афғонии инфрасохтори транзитӣ ва ҳамоҳангсозии фаъолият ҷиҳати оғози пӯрраи хатти интиқоли барқ буд.
То имрӯз сохтмони объектҳои лоиҳаи CASA-1000 дар ҳудуди Тоҷикистон, Қирғизистон ва Покистон ба таври пурра ба охир расида, ба истифода омода мебошанд. Ягона ҳалқаи боқимонда қитъаи транзитии Афғонистон ба шумор меравад.
Мувофиқи нақшаи аниқшуда, корҳои сохтмонию монтажӣ дар ҳудуди Афғонистон бояд то баҳори соли 2027 ба пӯррагӣ ба анҷом расанд. Ин имкон медиҳад, ки тамоми инфрасохтори лоиҳаи CASA-1000 дар соли 2027 зери шиддати барқ ворид карда шуда, интиқоли «энергияи сабз» аз Осиёи Марказӣ ба Осиёи Ҷанубӣ оғоз ёбад.
Дар ҷараёни мулоқот ҷонибҳо инчунин масъалаҳоеро, ки ба рӯзномаи ҷаласаи навбатии Шӯрои байниҳукуматии CASA-1000 дохил мегарданд, баррасӣ намуданд. Баргузории ин ҷаласаи сатҳи баланд дар даҳрӯзаи аввали моҳи октябри соли 2026 дар Ҷумҳурии Қирғизистон нақшакашӣ шудааст.
Амалишавии пӯрраи лоиҳаи CASA-1000 барои таҳкими ҳамкориҳои иқтисодӣ дар минтақа такони ҷиддӣ бахшида, ба Тоҷикистон ва Қирғизистон имкон медиҳад, ки нерӯи барқи зиёдатии тобистонаи худро ба бозорҳои ниёзманд содир намоянд.
Акс: Вазорати энергетика ва захираҳои оби Ҷумҳурии Тоҷикистон