Душанбе, 8 октябр, – АИ «Корвон Иттилоот». Аз 5 октябри соли 2026 муқаррароти Ёддошти тафоҳум байни Ҳукумати Ҷумҳурии Тоҷикистон ва Ҳукумати Ҷумҳурии Исломии Эрон дар бораи бекор кардани раводид барои соҳибони шиносномаҳои умумишаҳрвандии хориҷӣ пурра эътибор пайдо кард. Дар ин бора Вазорати корҳои хориҷии Ҷумҳурии Тоҷикистон хабар дод.

Мутобиқи ҳуҷҷат шаҳрвандони Тоҷикистон ва Эрон — соҳибони шиносномаҳои амалкунандаи умумишаҳрвандии хориҷӣ — метавонанд бидуни раводид ба қаламрави давлати ҷониби дигар ворид шаванд, гузаранд ё муваққатан то 30 рӯз дар давоми ҳар гуна давраи 90-рӯза қарор гиранд.

Реҷаи бераводид тавассути ҳамаи гузаргоҳҳои байналмилалии сарҳадӣ, аз ҷумла гузаргоҳҳои заминӣ, фурудгоҳҳои байналмилалӣ, инчунин ҳангоми омадан бо ҳавопаймо аз кишварҳои сеюм амал мекунад. Ҳамзамон риояи талаботи қонунгузории миллии ҳарду давлат ҳатмӣ боқӣ мемонад.

Ҷорӣ намудани реҷаи пурраи бераводид байни Тоҷикистон ва Эрон идомаи мантиқии самти сода кардани сафарҳои мутақобила ва таҳкими робитаҳои гуманитарӣ, тиҷоратӣ ва сайёҳӣ мебошад.

Барои шаҳрвандони ҳарду кишвар ин маънои коҳиши назарраси монеаҳои бюрократӣ ва кам кардани хароҷоти вақтӣ ва молиявӣ ҳангоми сафарҳоро дорад.

Дар шароити рушди хатсайрҳои нақлиётӣ ва афзоиши таваҷҷуҳ ба сайёҳӣ ва тиҷорати мутақобила чунин чора имкониятҳои иловагӣ барои васеъ кардани тамосҳо дар сатҳи ҷомеаҳо фароҳам меорад. Ҳамзамон нигоҳ доштани ҳудуди 30-рӯзаи иқомат дар доираи давраи 90-рӯза имкон медиҳад, ки назорат ва тавозуни манфиатҳои ҳарду ҷониб ҳифз карда шавад.

АКС: Вазорати корҳои хориҷии Ҷумҳурии Тоҷикистон