Душанбе, 10 октябр, – АИ «Корвон Иттилоот». Дар доираи сафари корӣ ба Ҷопон намояндагони Муассисаи давлатии «Маркази барномаҳои байналмилалӣ» бо роҳбарияти Академияи забонҳои Ҷопон-Чин (Japan-China Language Academy) мулоқот анҷом доданд. Дар вохӯрӣ ба густариши имкониятҳои таълимӣ барои ҷавонони Тоҷикистон ва фароҳам овардани шароити мусоид барои дохил шудан ба муассисаҳои таҳсилоти олии Ҷопон таваҷҷуҳи махсус зоҳир гардид.

Ҷонибҳо масъалаҳои ба роҳ мондани омӯзиши забони ҷопонӣ дар заминаи Маркази барномаҳои байналмилалӣ, ҷалби омӯзгорони ҷопонӣ ва омодасозии ҷавонони тоҷикро барои идомаи таҳсил дар донишгоҳҳо ва дигар муассисаҳои таълимии Ҷопон баррасӣ карданд. Ҳамчунин, фароҳам овардани шароити мусоид барои таҳсили донишҷӯёни тоҷик дар ин кишвар аз мавзӯъҳои муҳими мулоқот буд.

Дар натиҷаи вохӯрӣ миёни Маркази барномаҳои байналмилалӣ ва Академияи забонҳои Ҷопон-Чин Созишнома оид ба омӯзиши забони ҷопонӣ ва дастгирии донишҷӯёни тоҷик барои таҳсил дар Ҷопон ба имзо расид.

Ҳадафи санад рушди ҳамкориҳои таълимӣ, васеъ намудани имкониятҳои омӯзиши забони ҷопонӣ ва омодасозии ҷавонони Тоҷикистон барои дохил шудан ба муассисаҳои таълимии Ҷопон мебошад. Ҷонибҳо омодагии худро барои идомаи ҳамкориҳои муштарак ва рушди минбаъдаи робитаҳо дар соҳаи маориф изҳор намуданд.

Академияи забонҳои Ҷопон-Чин ба омӯзиши забони ҷопонӣ барои шаҳрвандони хориҷӣ, омодасозии довталабон барои дохил шудан ба донишгоҳҳо ва коллеҷҳои касбии Ҷопон, инчунин дастгирии донишҷӯёни хориҷӣ дар раванди таҳсил машғул аст.

Дар мулоқот намояндагони Маркази барномаҳои байналмилалӣ бо роҳбарии директори муассиса Рамазон Одиназода ва директори Академияи забонҳои Ҷопон-Чин Ҷанг Ёншенг иштирок намуданд.

ФОТО: Маркази Дурахшандагон