Намоиши нахустини филм дар Кохи Лоҳутӣ баргузор шуда, дар он намояндагони Мақомоти иҷроияи ҳокимияти давлатии вилояти Хатлон, кормандони ташкилоту муассисаҳои давлатӣ, аҳли фарҳанг, ҳунармандону филмофарони ҷумҳурӣ ва вилоят, инчунин дӯстдорони синамои тоҷик иштирок намуданд.

Дар оғози чорабинӣ намояндаи Мақомоти иҷроияи ҳокимияти давлатии вилояти Хатлон аз номи раиси вилоят иштирокдорон, кормандони соҳаи синамо, ҳунармандон ва филмофаронро ба муносибати Рӯзи кинои тоҷик табрик гуфт. Дар суханронӣ саҳми онҳо дар рушди санъати миллӣ ва муаррифии арзишҳои фарҳангии Тоҷикистон муҳим арзёбӣ гардид.

Зикр шуд, ки рушди синамои миллӣ, офаридани филмҳои дорои мазмуни баланди тарбиявию маърифатӣ ва инъикоси зиндагии мардум дар тарбияи маънавии ҷомеа нақши муҳим доранд.

Дар идомаи чорабинӣ як қатор кормандон ва ҳунармандони Муассисаи давлатии «Хатлонсинамо» барои саҳми арзанда дар рушди соҳаи синамо ва фаъолияти пурсамар бо сипосномаҳои раиси вилояти Хатлон сарфароз гардонида шуданд.

Қисми ниҳоии чорабинӣ ба нахустнамоиши филми ҳунарии «Сабр» бахшида шуд. Филм ба бозтоби арзишҳои ахлоқӣ равона гардида, ҳадаф дорад, ки дар таҳкими ҳисси масъулиятшиносӣ дар ҷомеа саҳм гузорад.

Акс: манбаъ бояд мушаххас карда шавад.