Душанбе, 17 октябр, – АИ «Корвон Иттилоот». Рӯзҳои синамои Эрон ба густариши робитаҳои фарҳангии Тоҷикистон ва Эрон, инчунин таҳкими ҳамкории эҷодӣ миёни синамогарони ду кишвар равона шудаанд. Ин чорабинӣ бахше аз барномаи байналмилалии сеюмин Синамоҷоизаи миллии «Тоҷи Сомон» мебошад, ки аз 15 то 20 октябр дар шаҳри Душанбе баргузор мегардад.

Дар доираи Рӯзҳои синамои Эрон тамошобинон метавонанд бо асарҳои нави коргардонҳои эронӣ, муҳтавои филмҳои онҳо ва равишҳои ҳунарие шинос шаванд, ки тамоюлҳои муосири рушди синамои миллии ин кишварро инъикос мекунанд. Чунин намоишҳо барои ошноӣ бо анъанаҳои синамои кишвари ҳамсоя ва табодули таҷрибаи касбӣ миёни намояндагони ду фарҳанг имконият фароҳам меоранд.

Тибқи барнома, намоиши филмҳои эронӣ дар кинотеатри «Наврӯз»-и пойтахт баргузор мешавад. Аз ҷумла, филми «Қиморбоз» бо коргардонии Муҳсин Баҳорӣ ва филми «Дар оғӯши дарахт»-и коргардон Бобаки Хоҷапошо пешкаши тамошобинон мегарданд.

Баргузории Рӯзҳои синамои Эрон дар доираи «Тоҷи Сомон» ба барномаи синамоҷоиза мазмуни байналмилалии фарҳангӣ бахшида, барои тавсеаи ҳамкории эҷодӣ ва густариши робитаҳои касбии синамогарони Тоҷикистон ва Эрон замина фароҳам меорад.

Акс:Радиои “Садои Душанбе”