Душанбе, 7 ноябр, – АИ «Корвон Иттилоот». 5 ноябри соли 2026 дар шаҳри Женева дар доираи даври чоруми Баррасии умумии даврӣ (ШБО)-и Шӯрои Созмони Милали Муттаҳид оид ба ҳуқуқи инсон муколамаи интерактивӣ бо Ҷумҳурии Тоҷикистон баргузор гардид. Дар он намояндагони 95 давлат иштирок намуда, оид ба таҳкими минбаъдаи низоми миллии ҳифзи ҳуқуқи инсон тавсияҳои худро пешниҳод карданд.
Яке аз масъалаҳои меҳварии муколама пешгирии шиканҷа ва дигар шаклҳои муносибати бераҳмона, ғайриинсонӣ ё пасткунандаи шаъну шарафи инсон буд.
Як қатор давлатҳо ба Тоҷикистон тавсия доданд, ки Протоколи иловагӣ ба Конвенсияи СММ зидди шиканҷаро ба тасвиб расонида, Механизми миллии пешгирикунандаро таъсис диҳад. Ин механизм метавонад ба назорати мустақили ҷойҳои маҳрумият аз озодӣ ва пешгирии чунин ҳуқуқвайронкуниҳо мусоидат намояд.
Қисми алоҳидаи тавсияҳо ба ҳифзи ҳуқуқи шахсони бо ВНМО зиндагикунанда бахшида шуд. Аз ҷумла, пешниҳод гардид, ки моддаи 125 Кодекси ҷиноятии Ҷумҳурии Тоҷикистон аз эътибор соқит карда шуда, интиқоли ВНМО аз доираи ҷавобгарии ҷиноятӣ хориҷ карда шавад. Инчунин, зарурати қатъи таъқиби ҷиноятӣ дар ҳолатҳое таъкид гардид, ки он танҳо ба мақоми шахс аз рӯи ВНМО асос ёфтааст.
Иштирокчиён ҳамчунин ба таҳкими иқтидори институтсионалӣ ва таъмини мустақилияти Ваколатдор оид ба ҳуқуқи инсон дар Ҷумҳурии Тоҷикистон таваҷҷуҳ зоҳир карданд. Тавсияҳо мутобиқ намудани фаъолияти ниҳоди миллии ҳифзи ҳуқуқи инсонро ба Принсипҳои Париж пешбинӣ мекунанд.
Масъалаи пешгирии зӯроварӣ дар оила низ мавриди таваҷҷуҳи махсус қарор гирифт. Як қатор давлатҳо ҷонибдори ҷиноят эътироф намудани чунин амалҳо ва тақвияти механизмҳои ҳуқуқии ҳимояи ҷабрдидагон шуданд. Ҳамзамон, тавсияҳо оид ба такмили қонунгузории миллӣ, иҷрои уҳдадориҳои байналмилалӣ ва густариши кафолатҳои ҳифзи ҳуқуқи гурӯҳҳои осебпазири аҳолӣ пешниҳод гардиданд.
Марҳилаи минбаъда баррасии тавсияҳои пешниҳодшуда аз ҷониби Тоҷикистон ва муайян намудани мавқеи кишвар дар масъалаи қабул ва татбиқи онҳо хоҳад буд. Ин раванд самтҳои минбаъдаи такмили низоми миллии ҳифзи ҳуқуқи инсонро муайян хоҳад кард.
Акс: Бюро оид ба ҳуқуқи инсон ва риояи қонуният / Swiss Cooperation – Tajikistan