Қозоғистон Бош вазири Олжас Бектенов Туркияга амалий ташриф буюрди. Анқарада уни Туркия Республикаси Президенти Ражаб Эрдоған кутиб олди. Ташрифнинг асосий мақсади Қозоғистон-Туркия ҳамкорлигини ривожлантиришни таъминлаш ва икки мамлакат иқтисодий ўсишини тезлаштириш вазифасини бажариш учун янги тармоқларда ҳамкорликнинг мумкин бўлган имкониятларини очиб беришдан иборат.

Ўзаро манфаатли ҳамкорликнинг қўшма йўналишлари қаторига донни қайта ишлаш, кўмир кимёси, нефть ва газ саноати, нефть кимёси ва бошқалар киради.

Туркия вице-Президенти Жевдет Йилмаз билан музокаралар чоғида транзит ва транспорт, қишлоқ хўжалиги, ишлаб чиқариш, рақамлаштириш ва туризм соҳаларида икки томонлама ҳамкорликни ривожлантириш масалалари муҳокама қилинди.

«Туркиянинг қардош Қозоғистон билан савдо-иқтисодий алоқаларида ижобий тенденция кузатилмоқда. Бу бизнес вакиллари, инвесторлар ва экспортчиларнинг катта ютуғидир. Бугунги музокараларнинг алоҳида аҳамиятини ҳам таъкидламоқчиман. Мамлакатларимиз ҳукуматлари иқтисодиётни ривожлантириш ва бизнесга ҳар томонлама ёрдам кўрсатиш бўйича биргаликдаги саъй-ҳаракатларни давом эттиради. Ишончим комилки, Қозоғистон ва Туркия ўртасидаги ҳамкорлик янги келишувлар туфайли кенгаяди», — деди Туркия Республикаси вице-Президенти Жевдет Йилмаз.

Изоҳ: Туркия Қозоғистоннинг бешта йирик савдо шерикларидан бири ва энг яхши 20 инвестор мамлакатларидан биридир. Қозоғистон умумий қиймати 630 миллион доллардан ортиқ 34 турдаги маҳсулотларини Туркияга экспортни оширишни истайди. Улар орасида металлургия, нефть-кимё, озиқ-овқат ва машинасозлик саноати маҳсулотлари бор.

Фото: Қозоғистон Республикаси Бош вазирининг расмий ахборот ресурси