Тожикистон регулятори матбуот хизматининг хабар беришича, имзоланган битим Тожикистон Миллий банки ва Ўзбекистон Марказий банки ўртасида молия-кредит ташкилотларини тартибга солиш ва назорат қилиш соҳасидаги ҳамкорликни мустаҳкамлашга қаратилган.

Ҳужжатда лицензиялаш, текширувлар, инқирозни бошқариш, шунингдек молиявий ҳисоботларни олиш ва қайта ишлаш жараёнини назорат қилиш билан боғлиқ масалаларни муҳокама қилиш кўзда тутилган. Бундан ташқари, шартнома кредит ташкилотлари фаолиятидаги хавфларни аниқлаш ва мониторинг қилиш, банк назорати, текшириш ва маълумот алмашиш стандартларини амалга оширишга қаратилган.

Таъкидланишича, Тожикистон Миллий банки ва Ўзбекистон Марказий банки ўртасидаги ҳамкорлик икки мамлакат миллий манфаатларини ҳимоя қилишни ҳисобга олган ҳолда амалга оширилади. Ушбу шартнома кредит ташкилотлари фаолияти устидан назоратни такомиллаштириш ва минтақада молия секторининг шаффофлигини оширишга ёрдам беради.

Фото: Тожикистон Президентининг матбуот хизмати