ШЫҰ Хатшылығында ШЫҰ-ға мүше мемлекеттердің ұлттық үйлестірушілер кеңесінің отырысы өтті. Тараптар Астанада ШЫҰ-ға мүше мемлекеттердің мемлекет басшылары кеңесі мен сыртқы істер министрлері кеңесінің алдағы отырыстарын дайындау барысын және ұйымның 2024 жылға арналған негізгі іс-шаралар жоспарына сәйкес Ұйым қызметінің мәселелерін талқылады.

Атап айтқанда, ШЫҰ елдері көшбасшыларының қарауына енгізілетін құжаттардың жобалары, оның ішінде Астана декларациясы, ШЫҰ-ның «әділ бейбітшілік пен келісім үшін әлемдік бірлік туралы» бастамасы және ШЫҰ-ны дамыту мәселелері бойынша бірқатар стратегиялық сипаттағы құжаттар қаралды.

«Астанадағы ШЫҰ-ға мүше мемлекеттер басшылары кеңесінің алдағы отырысы ұйымның бірлігін, ШЫҰ-ны жетілдіру жөніндегі байсалды, ауқымды және ұзақ мерзімді жұмысқа жалпы көзқарасты, жаңа сын-тегеуріндер мен қатерлер саласында өзара іс-қимылдың тиімді тетіктерін құруды тағы да көрсетеді. Саммитке дейінгі қалған күндерде барлығымыз осы тарихи кездесудің Астанада жоғары мазмұнды және ұйымдастырушылық деңгейде өтуі, оның қорытындылары ШЫҰ – ның жалпы тарихының жаңа бетін ашып, өзара тиімді көпжақты өзара іс-қимыл форматын неғұрлым жоғары деңгейге шығаруы үшін зор жұмыс атқаруымыз керек», — деп атап өтті Қазақстанның Ұлттық үйлестірушісі Мұрат Мұқышев.

Фото: ТМД Интернет-порталы