Қирғизистон Республикаси Вазирлар Маҳкамаси раисининг биринчи ўринбосари Адилбек Касималиев Саудия Арабистони Подшоҳлиги пойтахти Эр-Риёдга ишчи сафарини амалга оширди ва у ерда атроф-муҳит, сув ресурслари ва қишлоқ хўжалиги вазири Абдураҳмон бин Абдулмоҳсен Ал-Фадли билан учрашди.

Учрашувда икки мамлакат ўртасидаги сиёсий мулоқотни фаоллаштириш, савдо-иқтисодий алоқаларни кенгайтириш ва ишбилармон доиралар ўртасида тўғридан-тўғри алоқаларни ўрнатиш масалалари муҳокама қилинди. Қирғизистон-Саудия ҳукуматлараро комиссиясининг бўлажак йиғилиши, Бишкек ва Жидда ўртасидаги парвозлар, шунингдек, «Acwa Power» компанияси президенти Муҳаммад Абдулла Абунайян билан музокаралар кун тартиби ҳам кўриб чиқилди.

Учрашув иштирокчилари икки томонлама ҳамкорликка оид кенг кўламли масалалар юзасидан фикр алмашдилар. Адилбек Касималиев «Acwa Power» билан ҳамкорлик қилишдан манфаатдор эканини таъкидлаб, Қирғизистоннинг энергетика ва сув ресурслари соҳасидаги афзалликлари ҳақида гапирди. Ўз навбатида, компания президенти Марказий Осиё минтақасига, айниқса қайта тикланадиган энергия манбалари соҳасидаги лойиҳаларга сармоя киритишга тайёрлигини билдирди.

Шунингдек, улар компаниянинг Қамбарота ГЭС-1 қурилиш лойиҳасидаги иштироки ва гидроэлектростанция қуриш учун молиявий ресурсларни жалб қилиш мақсадида Венада бўлиб ўтадиган Халқаро энергетика инвестиция форумига таклифни муҳокама қилишди.

Сафар натижасида Ислом тараққиёт банки Президенти Муҳаммад Сулаймон Ал-Жассирнинг Қирғизистонга биринчи ташрифини ташкил этиш бўйича келишувга эришилди.

Сурат:  Қирғизистон Республикаси Вазирлар Маҳкамасининг расмий веб-сайти