Душанбе, 16 октябр, — АИ «Корвон Иттилоот». Таҳти раёсати муовини Сарвазири Ҷумҳурии Тоҷикистон Зиёзода Сулаймон Ризоӣ 15 октябр ҷаласаи кории назоратӣ оид ба рафти татбиқи ҳуҷҷатҳои банақшагирии стратегӣ баргузор гардид.

Ҷаласа мутобиқи ҷадвали ҳисоботи роҳбарони вазорату идораҳо, мақомоти иҷроияи маҳаллии ҳокимияти давлатӣ, корхонаю муассиса ва дигар ташкилотҳо доир шуд. Ҷадвали мазкур аз ҷониби Роҳбари Дастгоҳи иҷроияи Президенти Ҷумҳурии Тоҷикистон 9 ноябри соли 2025 таҳти № 30/10-223 тасдиқ гардидааст.

Дар баробари масъалаҳои дигари муҳим иштирокдорон рафти татбиқи барномаҳои давлатӣ дар самти кабудизоркунӣ, ҳифзи муҳити зист ва беҳтар намудани вазъи экологиро баррасӣ намуданд.

Кабудизоркунӣ яке аз самтҳои муҳими сиёсати экологӣ ба ҳисоб рафта, дар беҳтар шудани вазъи муҳити зист, коҳиш додани таъсири омилҳои номусоиди иқлимӣ, ҳифзи захираҳои табиӣ ва фароҳам овардани шароити мусоиди зиндагии аҳолӣ нақши муҳим дорад.

Дар ҷаласа ба сифати иҷрои чорабиниҳои кабудизоркунӣ таваҷҷуҳи алоҳида зоҳир гардид. Аз ҷумла, шинонидани дарахту буттаҳои ба шароити иқлими маҳал мутобиқ, нигоҳубини дурусти ниҳолҳо ва истифодаи самараноки захираҳои обӣ аз вазифаҳои афзалиятнок арзёбӣ шуданд. Риояи ин талабот барои таъмини нашъунамои ниҳолҳо ва нигоҳ доштани сабзазорҳои бунёдшуда аҳаммияти калон дорад.

Ҳамзамон, зарурати ҷалби мақомоти давлатӣ, муассисаю ташкилотҳо ва аҳли ҷомеа ба корҳои ободонию сабзкорӣ таъкид гардид. Ҳамкории сохторҳои дахлдор ва шаҳрвандон дар ин самт метавонад ба ташаккули фарҳанги экологӣ, баланд бардоштани масъулият барои ҳифзи табиат ва беҳтар гардидани симои шаҳру деҳот мусоидат намояд.

Зикр шуд, ки татбиқи саривақтии Барномаи давлатии кабудизоркунӣ масъулияти роҳбарони сохторҳои дахлдор ва назорати мунтазами иҷрои вазифаҳои ба зиммаи онҳо гузошташударо тақозо мекунад.

Дар натиҷаи шунидани ҳисоботҳо, баррасии масъалаҳо ва омӯзиши таклифу пешниҳодҳо қарори дахлдори ҷаласа қабул гардида, барои андешидани чораҳои зарурӣ ба масъулони дахлдор ирсол карда шуд.

Татбиқи пайгиронаи барнома ва чорабиниҳои ҳифзи муҳити зист барои беҳтар намудани вазъи экологӣ, ободонии маҳалҳо ва фароҳам овардани муҳити солим барои наслҳои имрӯзу оянда аҳаммияти муҳим дорад.

Акс: Кумитаи ҳифзи муҳити зисти назди Ҳукумати Ҷумҳурии Тоҷикистон