Қазақстанның Сыртқы істер министрлігінде экономикалық ынтымақтастық жөніндегі Үкіметаралық комиссияның 10-шы отырысы шеңберінде ұйымдастырылған қазақстан-словак бизнес-форумы өтті. Іс-шараға «Kazakh Invest «ҰК» АҚ және Словакияның «SARIO»инвестициялар мен сауданы дамыту агенттігі қолдау көрсетті. Форум екі елдің жетекші компанияларының атынан 80-нен астам қатысушыны жинады.

Энергетика, өнеркәсіп, ауыл шаруашылығы, көлік, логистика және білім беру сияқты негізгі секторлардағы ынтымақтастықты дамытуға басты назар аударылды. Іс-шара перспективалық бағыттарды талқылауға және Қазақстан мен Словакияның бизнес-қауымдастықтары арасында байланыс орнатуға мүмкіндік берді.

Қазақстан тарапынан Сыртқы істер министрінің орынбасары Роман Василенко, «Атамекен» ҰКП сыртқы сауда палатасының төрағасы Мұрат Кәрімсақов, «Қазақстанның экспорттық-кредиттік агенттігі» АҚ басқарма төрағасы Аллен Чайжунусов, «Kazakh Invest «ҰК» АҚ Басқарма төрағасының орынбасары Мадияр Сұлтанбек және «Qaztrade «Сауда саясатын дамыту орталығы» АҚ Бас директорының орынбасары Әсел Егембердиева сөз сөйледі.

Форумда Словакия атынан экономика министрінің орынбасары Владимир Шимоняк, «SARIO» бас директоры Роберт Шимончич және Словакия экспорттық-импорттық банкінің бас директоры Растислав Подгорец қатысты.

Пленарлық сессияны ашқан Роман Василенко форум қатысушыларға алғысын білдіріп, ынтымақтастықты тереңдетуге үміт білдірді. Ол Қазақстанның серіктестікті одан әрі кеңейтуге дайындығын атап өтіп, негізгі бағыттар арасында энергетика, өнеркәсіп, ауыл шаруашылығы, көлік және білім беру салалары ерекше көзге түсетінін атап өтті.

«Қазақстан мен Словакияның өзара тиімді әріптестік үшін айтарлықтай әлеуеті бар, және де біздің елімізге словак инвестицияларының көлемі артатынына сенімдімін. Қазақстан Словакияның су ресурстары мен атом энергетикасы сияқты салалардағы тәжірибесін қабылдауға ұмтылуда», — деп атап өтті Василенко.

Мадияр Сұлтанбек форум қатысушыларына Қазақстанның инвестициялық ахуалына шолу жасап, елдің 431 млрд доллардан астам инвестициясы бар Орталық Азиядағы тікелей шетелдік инвестициялардың ірі орталығы болып табылатынын атап өтті.

Форум B2B форматындағы екіжақты кездесулермен аяқталды, онда нақты іскерлік жобалар талқыланды, бұл одан әрі ынтымақтастықтың негізін қалады. Бұл іс-шара жаһандық экономикалық өзгерістер аясында Қазақстан мен Словакия арасындағы экономикалық байланыстарды нығайтуға бағытталған маңызды қадам болды.

Фото: ҚР СІМ