Ақордада төрт елдің төтенше және өкілетті елшілерінің Қазақстан Президентіне сенім грамоталарын тапсыру рәсімі өтті.
Сенім грамоталарын Кувейт Мемлекетінің Елшісі Адель Ахмед Сулейман Әл-Гунайман, Моңғолия Елшісі Гунааджавин Батжаргал, Монако Князьдігінің Елшісі Мирей Мартини және Сальвадор Республикасының Елшісі Юрий Павел Сантакрус Пердемо тапсырды.
Мемлекет басшысы дипломаттарды Қазақстандағы ресми миссиясының басталуымен құттықтап, олардың екіжақты ынтымақтастықты дамытуға үлес қосатынына сенім білдірді.
Президент Қазақстанда ауқымды реформалар жүргізіліп жатқанын мәлімдеді.
«15 наурызда жаңа, прогрессивті Конституцияны қабылдау бойынша референдум өтті. Біз «Заң және тәртіп» қағидатына негізделген Әділ Қазақстанды құрып жатырмыз. Біз білімді, инновацияны және жасанды интеллектті дамытуға бағытталған мемлекет болуға ұмтыламыз. Біздің елімізде биыл Жасанды интеллект жылы деп жарияланды және біз осы маңызды салада табысқа жету үшін қолдан келгеннің бәрін жасап жатырмыз», — деді Президент.
Қасым-Жомарт Тоқаев Қазақстанның барлық мемлекеттермен сындарлы және өзара тиімді ынтымақтастықты нығайтуға бағытталған бейбіт және теңгерімді сыртқы саясатты жүргізетінін атап өтті.
«Мен Қазақстан сіздердің елдеріңіздің мүдделерін ілгерілету үшін ең кең мүмкіндіктерді ұсынатынына сенімдімін. Келесі апта өте қарбалас болады деп күтілуде, өйткені біз Моңғолия Президентінің сапарын күтіп отырмыз. Содан кейін Астанада БҰҰ қамқорлығымен Аймақтық экологиялық саммит және Аралды құтқару халықаралық қорының Мемлекет басшылары кеңесінің отырысы өтеді. Сіздер біздің еліміздегі оқиғаларды мұқият бақылап, өзара ынтымақтастық әлеуетін нығайтуға елеулі үлес қосатындарыңызға сенімдімін. Біз ашық нарықтық экономиканы дамытуға ұмтыламыз және шетелдік инвестициялардың ағынын құптаймыз. Қазақстан негізгі халықаралық қаржы институттарымен және ұйымдарымен тығыз байланыс орнатқан», — деп атап өтті Мемлекет басшысы.
Соңында Қасым-Жомарт Тоқаев елшілерге табыс тілеп, өз елдерінің көшбасшыларына жылы лебізін жеткізді.
Дереккөз: ХАБАР Ақпарат агенттігі