Астана, 2026 жылғы 18 қыркүйек – Karavan Info ақпараттық агенттігі. Қазақстан өз өнімдерін Италия нарығына экспорттаудың қосымша әлеуетін 307,5 миллион АҚШ долларына бағалайды. Бұл туралы Сауда және интеграция министрі Арман Шаққалиев Италияның Сыртқы істер және халықаралық ынтымақтастық жөніндегі мемлекеттік хатшысының орынбасары Мария Триподимен кездесуі барысында мәлімдеді. Тараптар екіжақты сауда динамикасын, шикізат емес экспортты кеңейтуді және өнеркәсіптік және технологиялық ынтымақтастықтың перспективаларын талқылады.
«Италия — Қазақстанның Еуропадағы негізгі сауда-экономикалық серіктестерінің бірі. Біз өзара саудамызды кеңейтудің айтарлықтай әлеуетін көріп отырмыз. Біздің бағалауымыз бойынша, қазақстандық өнімдердің Италия нарығына қосымша әлеуеті шамамен 307,5 миллион долларды құрайды. Бұл ең алдымен металлургия, мұнай-химия, тамақ, химия және машина жасау салаларының өнімдеріне қатысты», — деп атап өтті Арман Шаққалиев.
2025 жылдың соңына қарай Қазақстан мен Италия арасындағы өзара сауда 16,9 миллиард АҚШ долларын құрады. 2026 жылдың қаңтарынан шілдесіне дейін сауда айналымы 9,79 миллиард АҚШ долларына жетті, оның ішінде Қазақстаннан экспорт 9 миллиард АҚШ долларын, ал Италиядан импорт 789,6 миллион АҚШ долларын құрады.
«Біз Италия мен Қазақстан арасындағы қарым-қатынас деңгейін және екіжақты сауданың оң динамикасын жоғары бағалаймыз. Италия Қазақстанның экономикасын әртараптандыруды қолдау үшін өз технологияларымен және тәжірибесімен бөлісуге дайын. Логистика — ерекше сала. Біз бұл саланы одан әрі жаңғырту үшін тәжірибе мен технологиялар алмасуға дайынбыз», — деп атап өтті Мария Триподи.
Фото : MTI RK