Президент Қасым-Жомарт Тоқаев Қытай Халық Республикасының Қазақстандағы елшісі Чжан Сяомен кездесу өткізді. Әңгіме барысында дәстүрлі түрде достыққа, тату көршілікке және өзара сыйластыққа негізделген екі ел арасындағы қатынастардың тарихи негізі атап өтілді.

Президент саяси диалогты, сауда-экономикалық әріптестікті, мәдени алмасуларды, білім беру бағдарламаларын, ғылыми бастамаларды және қауіпсіздік саласындағы бірлескен шараларды қамтитын Қазақстан мен Қытай арасындағы өзара іс-қимылдың белсенді сипатын атап өтті.

БҰҰ, ШЫҰ, АӨСШК және «Орталық Азия – Қытай»сияқты халықаралық ұйымдар мен өңірлік форматтар шеңберіндегі ынтымақтастыққа ерекше назар аударылды.

Қасым-Жомарт Тоқаев Чжан Сяоның жұмысын жоғары бағалап, оның екіжақты қарым-қатынастарды дамытудағы маңызды рөлін атап өтті. Чжан Сяоның қазақ-қытай әріптестігін нығайтудағы сіңірген еңбегін мойындай отырып, Президент елшіні II дәрежелі «Достық» орденімен марапаттады.

Қытай елшісі жоғары баға бергені үшін алғысын білдіріп, Бейжіңнің стратегиялық әріптестікті одан әрі тереңдетуге деген ұмтылысына сендірді.

Фото: Ақорданың баспасөз қызметі