ҚР өнеркәсіп және құрылыс министрі Қанат Шарлапаев жаһандық инвестициялар жөніндегі қазақстандық дөңгелек үстел (KGIR-2024) аясында Zijin Mining компаниясының халықаралық істер жөніндегі бірінші бас директоры Ляо Цзяншэнмен кездесті. Әлемдегі ең ірі алтын өндіруші конгломераттардың бірі Zijin Mining Қазақстанда өзінің қатысуын кеңейтуге қызығушылық білдірді.

Кездесу барысында тау-кен металлургия саласындағы перспективалы жобалар талқыланды. Компания түсті және бағалы металдар концентраттарын өндіру үшін байыту фабрикасын салуды жоспарлап отыр, бұл жаңа жұмыс орындарын құруға және Қазақстанның экспорттық әлеуетін арттыруға мүмкіндік береді. Сонымен қатар, Zijin Mining жаңа учаскелерде геологиялық барлау жұмыстарын жүргізуге ниетті, бұл елдің минералды-шикізат базасын кеңейтуге мүмкіндік береді.

Қазақстанның өнеркәсіп және құрылыс министрі Zijin Mining компаниясымен ынтымақтастыққа дайын екенін білдірді. Ол Қазақстанның инвестициялық тартымдылығын және инвесторлар үшін жасалған қолайлы жағдайларды атап өтті.

Фото: ҚР өнеркәсіп және құрылыс министрлігі