БИШКЕК, 2026-жылдын 4-майы – Karavan Info маалымат агенттиги. 2026-жылдын 29–30-апрелинде Т. Сатылганов атындагы Кыргыз улуттук филармониясында "Чек арасыз симфония" аттуу эл аралык музыкалык концерт өтүп, унутулгус маданий кече тартууланды. Бул тууралуу Маданият министрлигинин басма сөз кызматы билдирди.
Иш-чарага биринчи айым Айгүл Жапарова, мамлекеттик катчы Арслан Койчиев, маданият, маалымат жана жаштар саясаты министринин орун басары Аскаралы Мадаминов, шаардын мэри Айбек Жунушалиев, БУУнун Кыргызстандагы туруктуу координатору Антье Грейв жана башка ардактуу коноктор катышты.
Концерттин негизги максаты – музыка аркылуу элдерди, маданияттарды жана чыгармачыл дүйнөлөрдү бириктирүү.
Концерттик программада Кыргыз Республикасынын эмгек сиңирген маданият ишмери, Өзбекстандын эл артисти, дирижер жана көркөм жетекчи Нур Өмүрбаев жетектеген Кыргыз Улуттук филармониясынын эстрадалык-симфониялык оркестри, ошондой эле немис композитору, аранжировкалоочусу жана эл аралык музыкалык долбоорлордун директору Адриан Верум жетектеген ар кандай улуттардын музыканттарынан турган ODK оркестри катышты.
Эки оркестр классикалык, этникалык жана заманбап музыканы жаңы симфониялык форматта тартуулоо үчүн биригишти. Көрүүчүлөр кыргыз, европалык, кытай, монгол, испан, немис, орус, түрк жана башка улуттардын чыгармаларынан ырахат алышты.
Улуттук мурасты заманбап үн менен көрсөтүүгө мүмкүндүк берген кыргыз музыкасынын жаңы симфониялык аранжировкаларына өзгөчө көңүл бурулду.
Белгилүү аткаруучулар Каныкей, Курал Чокоев, Аксай Мукамбет уулу, Гүлзада Рыскулова, Азат Сыдыков, Эльмира Тажиева, Виктория Алябьева, Адилет Жумашев, ошондой эле эл аралык солисттер жана музыканттар: Адриан Верум, Зураб Жаганидзе, Эберхард Хан, Андреф Рейх Керчес, Ральф Рейх Керчес, Вильф Рейх Керчес, Фабиан Вендт, Люси Чжао, Кандара Дибате, Кан Демирел, Кан Бэтмен, Чао Хуа, Жулия Мертен.
Музыкалык чыгармалар дүйнө жүзүндөгү уникалдуу аспаптардын коштоосунда аткарылды: клавишалар (Германия, АКШ), бамбук жана чоң флейта (Жапония, Германия), диджериду (Австралия), труба жана флюгельхорн (Египет, Европа, Бавария), алфорн жана хакбретт (Германия, Австрия, Швейцария), кажон (Түштүк Америка), кора (Батыш Африка), баглама (Түркия), гитара (Түштүк Америка, Германия), бас-гитара (Европа, АКШ), эрху жана пипа (Кытай), домра (Россия), дарбука (Түркия).
Айрым чыгармаларда импровизация элементтери камтылган, алар музыканттардын чыгармачылык эркиндигин жана жандуу өз ара аракеттенүүсүн баса белгилеген.
Долбоордун өзгөчөлүгү – кыргыз музыканты Дастан Биримкулов комузда, кыл кыякта жана башка улуттук аспаптарда ойногондуктан, ODK оркестринин келечекте дүйнө жүзү боюнча концерттик турларына катышат.
Концертти Artament International фондунун негиздөөчүсү Сана Лавров жана журналист, "Мыкты маданият" сыйлыгынын ээси Гүлзат Шаршеналиева уюштурушту.
Сүрөт: Кыргыз Республикасынын Маданият министрлиги