Бишкек, 2026-жылдын 10-июну – Karavan Info маалымат агенттиги. Шаршен Термечиков атындагы Чүй облустук музыкалык драма жана сатира театрында Кыргыз Республикасынын эл жазуучусу Султан Раевдин чыгармасынын негизинде коюлган "Арал" спектаклинин премьерасы өттү. Бул тууралуу Маданият министрлигинин басма сөз кызматы билдирди.

Премьерага пьесанын автору, коомдук ишмер, Кыргыз Республикасынын эл жазуучусу Султан Раев катышып, режиссер Барзу Абдураззаковду жана театрдын жамаатын жаңы спектаклдин ийгиликтүү башталышы менен куттуктады.

"Арал" пьесасы адамзаттын руханий баалуулуктары, экологиялык маселелер жана заманбап коомдогу актуалдуу маселелер жөнүндө терең ой жүгүртүүгө үндөгөн чыгарма катары көрүүчүлөрдүн арасында чоң кызыгууну жаратты.

Премьера көрүүчүлөр тарабынан жылуу кабыл алынып, чыгармачыл топтун эмгеги жогору бааланды. Спектаклдин көркөм багыты, режиссёрдун жаңычылдыгы жана актердук чеберчилиги көрүүчүлөр тарабынан таанылып, узакка созулган кол чабууларга арзыды.

Сүрөт: Кыргыз Республикасынын Маданият министрлиги