Астанада Европа реконструкциялоо жана өнүктүрүү банкынын (ЕРӨБ) президенти Одил Рено-Бассо Казакстандын президентинин төрагалыгы алдында өткөн Чет элдик инвесторлор кеңешинин жыйынына катышып, банктын өлкөдөгү жаңы кеңсесинин салтанаттуу ачылышына катышты. Салтанатка Казакстандын каржы министри Мади Такиев да катышып, ЕРӨБдү куттуктап, мындан аркы жемиштүү кызматташууга ишенимин билдирди.

«Жаңы кеңсе маанилүү демилгелердин жана амбициялуу долбоорлордун борбору болуп калат. ЕРӨБ негизги реформаларды ишке ашырууда жана туруктуу өсүштү колдоодо Казакстан үчүн ишенимдүү финансылык өнөктөш бойдон калууда», – деп белгиледи Такиев.

Иш-чаранын алкагында ЕРӨБ эки негизги макулдашууга кол койду: Кокшетауда 630 орундуу көп профилдүү оорукананы куруу үчүн мамлекеттик-жеке өнөктөштүк келишимине карата түз макулдашуу жана Павлодардагы трамвай паркын модернизациялоого кредиттик макулдашуу. Бул долбоорлор өлкөнүн аймактарында инфраструктураны өнүктүрүүгө жана жашоо сапатын жакшыртууга багытталганы кабарланууда.

Сүрөт: Каржы министрлиги