ООГАНИСТАН, 2026-жылдын 18-августу – Karavan Info маалымат агенттиги. Талибандын тышкы иштер министри молдо Амир Хан Муттаки АКШны Кабулга кайтып келүүгө, элчилигин кайра ачууга жана Ооганстандын экономикасынын ар кандай тармактарына инвестиция салууга чакырды.

Дүйшөмбү күнү, 17-августта, АКШнын Мамлекеттик департаменти Муттакинин сунушуна бир топ катаал жооп кайтарды.

АКШнын Мамлекеттик департаменти Вашингтон Талибанды Ооганстандын өкмөтү катары тааныбай турганын жана анын ишмердүүлүгүн каржылоону көздөбөй турганын билдирди.

Департамент Талибандын аракеттери аймакта тынчтыкты жана туруктуулукту камсыз кылууда конструктивдүү ролду ойноого даяр эместигин көрсөтүп турганын белгиледи.

Бул билдирүү Талибандын тышкы иштер министри Амир Хан Муттакинин АКШ менен дипломатиялык мамилелерди калыбына келтирүү, Кабулдагы Америка элчилигин кайра ачуу жана Ооганстандын экономикасына инвестиция салуу чакырыктарынан кийин жасалды.

Мамлекеттик департамент Кошмо Штаттар талибдер менен бул Америка элинин кызыкчылыгына туура келгенде гана байланыша турганын баса белгиледи.

Вашингтон ошондой эле талибдерди Доха келишиминин алкагындагы терроризмге каршы күрөшүү боюнча милдеттенмелерин аткарбай, өзгөчө аялдар менен кыздарга карата катаал чектөөлөрдү киргизип жатат деп айыптады.

Буга чейин БУУнун эксперттери өлкөлөрдү адам укуктары боюнча олуттуу прогресске жетишпесе, талиптер менен мамилелерди нормалдаштырбоого чакырышкан.

Сүрөт: Fox News