Корея республикасына расмий сапар менен барган Казакстандын Тышкы иштер министри Мурат Нуртлеу Кореянын президенти Юн Сок Ёль менен жолугушуп, Корея тышкы иштер министрлигинин башчысы Чжо Тэ Ёль менен сүйлөшүүлөрдү жүргүздү. Жолугушуу саясий диалогдун жогорку деңгээлин жана эки өлкөнүн стратегиялык өнөктөштүктү тереңдетүүгө болгон умтулуусун тастыктады. Корея Республикасынын Президенти Казакстан менен экономикалык жана маданий байланыштарды мындан ары кеңейтүүгө кызыкдар экендигин билдирди.
Мурат Нуртле Казакстандын Президенти Касым-Жомарт Токаевдин куттуктоосун айтып, Корея Азия чөлкөмүндө ишенимдүү өнөктөш катары маанилүү орунду ээлей турганын баса белгиледи. Сүйлөшүүлөрдүн жүрүшүндө тараптар соода, инвестиция, ошондой эле маданий жана гуманитардык тармактардагы кызматташууну талкуулашты. Санариптик жана билим берүү долбоорлоруна, анын ичинде «Astana Hub» IT паркын өнүктүрүүгө жана жасалма интеллект жана чоң маалыматтар боюнча борборду түзүүгө өзгөчө көңүл бурулду.
Корея Республикасы Казакстандын алдыңкы 5 инвесторунун катарына кирери, ал эми эки тараптуу сооданын көлөмү 6 млрд АКШ долларына жеткени өзүнчө белгиленди. Мурат Нуртлеу визасыз режим жана өсүп жаткан туризм менен бекемделген маданий байланыштардын маанилүүлүгүн белгилеп, ишкер байланыштарды активдештирүүнү жана инвестициялык өз ара аракеттенүүнү кеңейтүүнү сунуштады.
Сапардын жыйынтыгы боюнча долбоорлорду артыкчылыктуу багыттарда өнүктүрүүнү камтыган 2025-2027-жылдарга кызматташуу боюнча иш-аракеттер планына кол коюлду. Маданий алмашуунун алкагында үстүбүздөгү жылдын 5-ноябрына чейин созула турган Казакстандын туристтик потенциалына арналган фотокөргөзмө өттү.
Сүрөт: МИД РК