Бишкек, 2026-жылдын 20-августу – Karavan Info маалымат агенттиги. Токтогул Сатылганов атындагы Кыргыз улуттук филармониясы жана Сеул искусство жана маданият фонду искусство жана маданият тармагында кызматташууну өнүктүрүү жөнүндө макулдашышты.

19-августта тараптар тиешелүү Өз ара түшүнүшүү жөнүндө меморандумга кол коюшту.

Документке Кыргыз Улуттук филармониясынын башкы директору Кыргызбай Осмонов жана SFACтын башкы директору Сон Хён Чжон кол коюшту.

Аземге Жогорку Кеңештин депутаты Рахат Жунушбаева, тышкы байланыштар боюнча кеңешчи Айсулу, бөлүм башчысы Ким Сон Хён жана команданын жетекчиси Ан Ми Ён да катышты.

Меморандумда Кыргызстан менен Корея Республикасынын ортосундагы маданий байланыштарды чыңдоо, тажрыйба алмашуу жана биргелешкен чыгармачыл долбоорлорду ишке ашыруу каралган.

Тараптар биргелешкен маданий, театралдык, музыкалык жана билим берүү долбоорлорун уюштурууну, ошондой эле мастер-класстарды, форумдарды, семинарларды жана башка иш-чараларды өткөрүүнү көздөп жатышат.

Чыгармачыл топтор менен сүрөтчүлөрдүн ортосундагы байланыштарды өнүктүрүүгө, жаңы демилгелерди колдоого жана маданий долбоорлорду биргелешип ишке ашырууга өзгөчө көңүл бурулат.

Сүрөт: Кыргыз Республикасынын Маданият министрлиги