Бишкек, 2026-жылдын 10-июну – Karavan Info маалымат агенттиги. 2026-жылы Кыргызстан биринчи жолу таэквондо боюнча дүйнөлүк чемпионатты жана Эл аралык мушташ өнөрү фестивалын өткөрөт. Бул тууралуу Эл аралык таэквондо федерациясынын (ITF) президенти Юнь Сонг жана федерациянын вице-президенти Юрий Калашников катышкан басма сөз жыйынында белгилүү болду.

Эл аралык уюмдун өкүлдөрүнүн айтымында, мындай деңгээлдеги турнирди өткөрүү өлкө үчүн тарыхый окуя болуп, дүйнөлүк спорт коомчулугунун көңүлүн Кыргызстанга бурат.

"Кыргызстанда биринчи жолу Дүйнөлүк мушташ өнөрү чемпионаты жана кеңири масштабдуу мушташ өнөрү фестивалы өтөт. Бул позитивдүү эмоцияларды тартуулап, таэквондонун өнүгүшүнө салым кошо турган ири спорттук иш-чара", – деп белгилешти уюштуруучулар .

ITF президенти Кыргызстан спорттун активдүү өнүгүшүнүн жана мушташ өнөрүнө болгон кызыгуунун өсүшүнүн аркасында мелдешти өткөрүү укугуна татыктуу түрдө ээ болгонун баса белгиледи.

Юрий Калашников өз кезегинде Кыргызстандагы таэквондо менен машыккандардын саны жыл сайын өсүп жатканын жана федерациянын өзү туруктуу өнүгүүнү көрсөтүп жатканын билдирди. Ошондой эле ал өткөн жылы эл аралык мелдештерде 15 коло медалга ээ болгон улуттук курама команданын ийгилигин белгиледи.

Дүйнөлүк чемпионат жана мушташ өнөрү фестивалы ондогон өлкөлөрдөн катышуучуларды тартып, Кыргызстандагы жылдын эң ири спорттук иш-чараларынын бирине айланат деп күтүлүүдө.