Бишкек, 2026-жылдын 17-октябры – Karavan Info маалымат агенттиги. 16-октябрда Армения Республикасына расмий сапарынын алкагында Кыргыз Республикасынын Президенти Садыр Жапаров Ереванда Армениянын Президенти Ваагн Хачатурян менен сүйлөшүүлөрдү жүргүздү.

Тараптар экономика, инвестиция, транспорт, айыл чарбасы, маалыматтык технологиялар, билим берүү жана туризм тармактарында кызматташуунун келечегин талкуулашты. Атап айтканда, маалымат технологиялары боюнча кызматташууну өнүктүрүү жана жасалма интеллект жаатында биргелешкен ишкана түзүү демилгесин изилдөө мүмкүнчүлүгү белгиленди.

Армениянын президенти Садыр Жапаровду Арменияга расмий сапары менен келип, жылуу тосуп алып, Биологиялык ар түрдүүлүк боюнча БУУнун Конвенциясынын Тараптарынын 17-конференциясынын Лидерлер саммитине катышкандыгы үчүн ыраазычылык билдирди.

Ваагн Хачатурян эки өлкөнүн ортосундагы саясий мамилелердин жогорку деңгээлин белгилеп, ар кандай деңгээлдеги үзгүлтүксүз байланыштардын жана эл аралык уюмдардын алкагында өз ара колдоонун маанилүүлүгүн баса белгиледи.

Президент Садыр Жапаров азыркы сапар Кыргыз Республикасынын башчысынын Арменияга биринчи расмий сапары экенин баса белгилеп, ал эки тараптуу мамилелердин өнүгүшүнө жаңы дем берет деген ишенимин билдирди.

Ошондой эле, Кыргыз мамлекетинин башчысы саясий диалогду андан ары бекемдөөнүн, аймактар аралык байланыштарды кеңейтүүнүн жана айлана-чөйрөнү коргоо, биологиялык ар түрдүүлүктү сактоо жана тоо экосистемалары жаатындагы кызматташтыктын маанилүүлүгүн белгиледи.

Жолугушуунун аягында Садыр Жапаров Армениянын президенти Ваагн Хачатурянды Кыргыз Республикасына расмий сапар менен келүүгө чакырды.

Сүрөт: Кыргыз Республикасынын Президентинин Администрациясы