Бишкек, 2026-жылдын 19-июну – Karavan Info маалымат агенттиги. Кыргыз Республикасы менен Италия Республикасы кылмыш иштери боюнча өз ара укуктук жардам көрсөтүү жөнүндө келишимге кол коюшту. Кол коюу аземи 2026-жылдын 9-июнунда Римде өттү.

Документке Кыргызстандын башкы прокурору Максат Асаналиев жана Италиянын юстиция министри Карло Нордио кол коюшту.

Макулдашуу эки өлкөнүн ортосундагы кылмыш-жаза укугу жаатындагы кызматташтыкты өнүктүрүүгө багытталган жана Кыргызстан менен Италиянын ортосундагы кылмыш иштери боюнча эл аралык кызматташтык жаатындагы келишимдик-укуктук базаны түзүүнү аяктайт.

Жаңы документ өз ара укуктук жардам көрсөтүүнүн заманбап укуктук механизмдерин, анын ичинде процессуалдык документтерди өткөрүп берүүнү, далилдерди чогултууну, айрым тергөө аракеттерин жүргүзүүнү, кылмыштуу активдерди аныктоону жана камакка алууну, ошондой эле эл аралык кызматташтыктын башка түрлөрүн белгилейт.

Белгилей кетсек, келишим трансулуттук уюшкан кылмыштуулукка, коррупцияга, киберкылмыштуулукка жана акчаны адалдоого каршы күрөшүүдө маанилүү куралга айланат.

Буга чейин, 2024-жылдын 4-октябрында Кыргызстандын президенти Садыр Жапаровдун Италияга расмий сапары учурунда тараптар кылмышкерлерди экстрадициялоо жана соттолгондорду өткөрүп берүү боюнча келишимдерге кол коюшкан.

Ошентип, жаңы келишим учурдагы укуктук базаны толуктап, эл аралык кылмыштуулукка каршы күрөшүүдө эки өлкөнүн компетенттүү органдарынын ортосундагы кызматташтыкты бекемдейт.

Сүрөт: Башкы прокуратура