БОРБОРДУК АЗИЯ, 2026-жылдын 11-октябры – Karavan Info маалымат агенттиги. Кыргызстандын Улуттук тарых музейи жана Казакстандын Кызылордо облустук тарых музейи кызматташууну өнүктүрүү, музей экспонаттары менен алмашуу жана биргелешкен көргөзмөлөрдү өткөрүү жөнүндө макулдашышты. Бул тууралуу Кыргыз Республикасынын Маданият министрлиги билдирди.

Кызматташтык жөнүндө меморандумга 2026-жылдын 9-октябрында Улуттук тарых музейинин директору Назгүл Өмүрзакова менен Кызылордо облустук тарых жана аймак таануу музейинин директору Нурмат Абдуллаулы Мансурдун жолугушуусунан кийин кол коюлган.

Тараптар көчмө жана конок көргөзмөлөрүн уюштуруу, уникалдуу артефакттарды жана сейрек кездешүүчү этнографиялык экспонаттарды жайылтуу жана тажрыйба алмашуу маселелерин талкуулашты.

Ошондой эле, документте маданий мурастарды сактоо, изилдөө жана калыбына келтирүү жаатында кызматташуу каралган.

Маданият министрлиги өнөктөштүк Кыргызстан менен Казакстандын ортосундагы маданий-гуманитардык байланыштарды өнүктүрүүгө жана эки өлкөнүн тарыхый жана маданий мурастарын жайылтууга өбөлгө түзүшү керектигин белгиледи.

Сүрөт: Кыргыз Республикасынын Маданият министрлиги