Бишкек, 2026-жылдын 16-июлу – Karavan Info маалымат агенттиги. Кыргызстан менен Орусия эмгек миграциясы үчүн адистерди даярдоо жана квалификацияны өз ара таануу жаатында кызматташууну күчөтүүнү көздөп жатышат.
Тиешелүү меморандумга эки өлкөнүн өкүлдөрүнүн жолугушуусунан кийин кол коюлганын Билим берүү министрлиги билдирди.
Сүйлөшүүлөр 14-июлда Билим берүү министрлигинин алдындагы Көз карандысыз сертификациялоо жана валидациялоо борборунда өттү.
Тараптар эмгек рыногунун талаптарына ылайык адистерди даярдоо, чет өлкөдө иштөөнү пландап жаткан жарандар үчүн кесиптик мүмкүнчүлүктөрдү кеңейтүү жана кызматкерлердин квалификациясын баалоо маселелерин талкуулашты.
Жолугушуу Кыргызстандын Эмгек, социалдык камсыздоо жана миграция министрлиги менен биргеликте уюштурулду.
Иш-чарага Кыргызстандын мамлекеттик органдарынын жана уюмдарынын, орусиялык жумуш берүүчүлөрдүн, персонал жана жеке жумушка орноштуруу агенттиктеринин, ширетүүнү көзөмөлдөө боюнча улуттук агенттиктин жана Россия өкмөтүнө караштуу Финансы университетинин өкүлдөрү катышты.
Сүйлөшүүлөрдүн жыйынтыгында эмгек миграциясы, кесиптик окутуу жана квалификацияларды өз ара таануу жаатында кызматташуу жөнүндө меморандумга кол коюлду.
Билим берүү министрлиги бул келишимдерди ишке ашыруу жарандарды окутууну жакшыртып, алардын кесиптик көндүмдөрүн эл аралык эмгек рыногунун талаптарына ылайыкташтыраарын белгиледи.
Сүрөт: Билим берүү министрлиги