Бишкек, 2026-жылдын 15-октябры – Karavan Info маалымат агенттиги. Кыргызстан менен Монголия кыргыз жашылчаларын, мөмө-жемиштерин жана кургатылган жемиштерин Монголия рыногуна жеткирүүнү кеңейтүү маселесин талкуулашты. Бул тууралуу Кыргыз Республикасынын Суу чарбасы, айыл чарбасы жана кайра иштетүү өнөр жайы министрлиги билдирди.

14-октябрда министрдин биринчи орун басары Ильич Марсбек уулу Монголиянын Кыргызстандагы Атайын жана Ыйгарым укуктуу элчиси Демчиг Тегшжаргал менен жолугушту.

Тараптар айыл чарба тармагындагы кызматташтыктын учурдагы абалын жана айыл чарба продукцияларынын өз ара соодасын көбөйтүү мүмкүнчүлүктөрүн талкуулашты.

Ата мекендик өндүрүүчүлөрдүн Монголия рыногуна киришине жана эки өлкөнүн ишкерлеринин ортосунда түз байланыштарды түзүүгө өзгөчө көңүл бурулду.

Ошондой эле мал чарба продукциялары менен соода жүргүзүүнүн келечеги талкууланды. Министрлик ветеринардык-санитардык талаптарды эске алуу менен бул тармакты андан ары өнүктүрүү зарылдыгын белгиледи.

Жолугушуунун жыйынтыгында тараптар кыргызстандык айыл чарба өндүрүүчүлөрүнүн экспорттук мүмкүнчүлүктөрүн кеңейтүүгө жана Кыргызстан менен Монголиянын ортосундагы соода-экономикалык байланыштарды чыңдоого кызыкдар экенин билдиришти.

Сүрөт: Суу чарбасы, айыл чарбасы жана кайра иштетүү өнөр жайы министрлиги