2026-жылдын 17-апрелинде Кыргыз Республикасынын Тышкы иштер министри Жээнбек Кулубаев Москвада өтө турган Көз карандысыз Мамлекеттер Шериктештигинин Тышкы иштер министрлеринин кеңешинин жыйынына жана Борбор Азия – Россия форматындагы министрлер жолугушуусуна катышат.

КМШнын Тышкы иштер министрлеринин кеңеши эл аралык күн тартибиндеги жана КМШнын алкагындагы кызматташтыктын актуалдуу маселелери боюнча пикир алмашууну, ошондой эле Шериктештиктин жогорку органдарынын кароосуна киргизиле турган документтерди кабыл алууну пландаштырууда.

Борбордук Азия жана Россия Федерациясынын тышкы иштер ведомстволорунун жетекчилеринин жолугушуусунда катышуучулар 2025-жылдын 9-октябрында Дүйшөмбү шаарында өткөн ушул форматтагы экинчи саммитте мамлекет башчылары тарабынан бекитилген 2025–2027-жылдарга карата биргелешкен иш-аракеттер планын ишке ашырууну талкуулашат. Бул контекстте соода тоскоолдуктарын жоюу, транспорттук жана логистикалык коридорлорду өнүктүрүү жана аймактык коопсуздукту чыңдоо боюнча практикалык кадамдарга өзгөчө көңүл бурулат.

Булак: Кыргыз Республикасынын Россия Федерациясындагы элчилиги