БИШКЕК, 2026-жылдын 1-июну – Karavan Info маалымат агенттиги. Кыргыз Республикасынын Президенти Садыр Жапаров Кыргызстан элин 1-июнь – Балдарды коргоонун эл аралык күнү менен куттуктады.

Мамлекет башчысынын куттуктоосу:

"Урматтуу балдар!

Сиздерди көптөн күткөн Эл аралык балдарды коргоо күнү – бактылуу балалыктын майрамы менен чын жүрөктөн куттуктайм!

Балалык – адамдын өмүрүндөгү эң жаркын, эң таза жана эң бактылуу мезгил. Дал ушул мезгилде бала дүйнөнү таза жүрөк, чексиз ишеним жана чоң кыялдар менен кабыл алат.

Сиздин шаңдуу күлкүңүз, чын жүрөктөн чыккан сезимдериңиз, балалык кыялдарыңыз жана умтулууларыңыз биздин жашообузду жарык кылып, өлкөбүздүн келечегине үмүт берет.

Бүгүн сиздер жаңы мүмкүнчүлүктөрдүн доорунда өсүп келе жатасыздар. Билимге умтулган, кең пейилдүү жана өз мекенин сүйгөн жаш муун – бул Кыргызстандын эң чоң байлыгы жана келечеги. Ошондуктан, ар бириңиздердин терең билим алып, адептүү, эмгекчил жана мекенчил инсандар болуп чоңоюшуңуздар абдан маанилүү.

Ар бир бала – уникалдуу талант, өзүнчө бир дүйнө. Айрымдарыңар чыгармачылыкка, айрымдарыңар илимге, ал эми дагы бирөөлөрүңөр спортко же технологияга кызыгасыңар. Эң негизгиси, өз жөндөмүңөрдү жана таланттарыңарды кылдаттык менен өнүктүрүп, кызыкчылыктарыңарды кеңейткиле. Көбүрөөк окуңуз, билимге умтулуңуз жана бийик максаттарды коюудан коркпоңуз, анткени өлкөбүздү өнүктүрүп, Кыргызстанды дүйнө жүзүнө атактуу кыла турган силерсиңер.

Урматтуу ата-энелер!

Балага жакшы тарбия жана терең билим берүү – бул улуттун келечегине инвестиция салуу дегенди билдирет. Балдарды бактылуу жана камкор чөйрөдө тарбиялоо – биздин жалпы ыйык милдетибиз. Сүйүү менен курчалган жана жакшы тарбия алган бала өлкөнүн чыныгы жараны болуп чоңоёт.

Мамлекет балдардын келечеги үчүн бардык шарттарды түзүүгө өзгөчө көңүл бура берет, анткени балдардын кубанычы – өлкөнүн кубанычы, ал эми алардын жаркын келечеги – мамлекетибиздин бекем келечеги.

Урматтуу балдар!

Өз мекенин сүйүү, улууларды сыйлоо, чынчылдык, боорукердик жана эмгекчилдик – күчтүү мамлекеттин пайдубалы. Ал эми силер бул күчтүү мамлекеттин келечегисиңер.

Ар дайым кыялдарыңыздар бийик болсун! Жүрөгүңүздөр мээримге, жүзүңүздөр жылмаюуга толсун!

Ар бир кадамыңыз чоң ийгиликтерге алып келишин, ата-энеңиздин, жакындарыңыздын жана бүтүндөй өлкөбүздүн сыймыгы болушуңуздарды чын жүрөктөн каалайм.

"Майрамыңыздар менен!"

Сүрөт: Кыргыз Республикасынын Президентинин Администрациясы