БИШКЕК, 2026-жылдын 5-майы – Karavan Info маалымат агенттиги. Кыргыз Республикасынын Президенти Садыр Жапаров бүгүн, 5-майда Ысык-Көл облусунун Чолпон-Ата шаарында Сейшел аралдарынын тышкы иштер жана диаспора министри Барри Форду кабыл алды.

Эки тараптуу кызматташтыкты өнүктүрүүгө байланыштуу маселелер, анын ичинде саясий диалогду бекемдөө жана соода-экономикалык, маданий-гуманитардык байланыштарды кеңейтүү талкууланды.

Мамлекет башчысы Кыргыз Республикасынын Африка өлкөлөрү менен кызматташууну тереңдетүүгө умтулушун белгилеп, географиялык алыстыкка карабастан, кызматташууну кеңейтүү үчүн олуттуу мүмкүнчүлүктөр бар экенин баса белгиледи.

Тараптар ошондой эле инвестиция, туризм, каржы жана санариптик технологиялар жаатындагы кызматташуунун келечегин талкуулашты.

Туризм тармагын жана санариптик трансформацияны өнүктүрүү боюнча тажрыйба алмашууга, ошондой эле "Тамчы" атайын финансылык инвестициялык аймагы жана "Учкун" ААК аркылуу кызматташууну түзүүгө өз ара кызыкчылыктар билдирилди.

Министр Барри Фор Сейшел аралдарынын президенти Патрик Эрмининин саламын жеткирди.

Мындан тышкары, климаттын өзгөрүшү жана туруктуу өнүгүү сыяктуу эл аралык күн тартибиндеги актуалдуу маселелер боюнча пикир алмашуу болду.

Бириккен Улуттар Уюмунун алкагындагы аракеттерди координациялоонун маанилүүлүгү баса белгиленди.

Жолугушуунун жыйынтыгында тараптар кыргыз-сейшел аралдарынын кызматташтыгын андан ары чыңдоого даяр экендиктерин ырасташты.

Соңунда Мамлекет башчысы Сейшел аралдарынын президенти Патрик Эрминиге салам жолдоп, аны ыңгайлуу учурда Кыргыз Республикасына келип кетүүгө чакырды.