Астана, 2026-жылдын 29-сентябры – Karavan Info маалымат агенттиги. Казакстандын президенти Касым-Жомарт Токаев Мангыстау облусундагы машыгуулар учурунда 14 аскер кызматкеринин каза болушунан кийин аскердик реформа планын иштеп чыгууну тапшырды. Ал бул тууралуу Коргоо министрлигинин жетекчилиги менен болгон жолугушууда жаңы министр Айдос Мырзахметовду тааныштырып жатып билдирди.

Мамлекет башчысы трагедиянын себептерин иликтөөнү, жооптуу кызмат адамдарынын аракеттерин кайра карап чыгууну жана армиядагы системалуу кемчиликтерди жоюуну талап кылды.

«Аскердик реформанын убагы келди. Бул кечиктирилгис милдет», – деп баса белгиледи Касым-Жомарт Токаев.

Реформанын артыкчылыктарына Куралдуу Күчтөрдү санариптештирүү, башкаруу системасын модернизациялоо, бюджеттик чыгымдардын натыйжалуулугун жогорулатуу жана аскер кызматкерлеринин коопсуздугун камсыздоо чараларын күчөтүү кирет.

Ошондой эле, президент командалык курамды тандоодо жеке берилгендикке эмес, кесипкөйлүгүнө жана тажрыйбасына жараша ачык-айкын критерийлерди киргизүүнү тапшырды.

Коопсуздук кеңешинин кеңсесине Коргоо министрлиги менен биргеликте он күндүн ичинде Аскердик реформанын конкреттүү планын даярдоо тапшырылды. Ал октябрь айынын экинчи жарымында Коопсуздук кеңешинин жыйынында каралат.

Сүрөт: Акорда