БОРБОРДУК АЗИЯ, 2026-жылдын 30-апрели – Karavan Info маалымат агенттиги. Өзбек маалымат каражаттары өлкөнүн Соода-өнөр жай палатасына шилтеме жасап, Өзбекстан менен Талибан администрациясынын өкүлдөрү эки тараптуу экономикалык байланыштарды кеңейтүү боюнча келишимге кол коюшканын билдиришти.

Палатанын маалыматы боюнча, ооган делегациясы менен жолугушуу Бириккен Улуттар Уюмунун Баңгизаттар жана кылмыштуулук боюнча башкармалыгынын (БУУ БКБ) Ооганстандын өнүгүшүн колдоого багытталган программасынын алкагында өттү.

Сүйлөшүүлөргө БУУнун Баңгизат жана кылмыштуулук боюнча башкармалыгынын Ооганстан, Борбордук Азия, Иран жана Пакистан боюнча аймактык өкүлү Оливер Столпе жана Жапониянын эл аралык кызматташтык агенттигинин (JICA) Ооганстандагы өкүлчүлүгүнүн башчысы Тосака Сута катышты.

Тараптар пахтаны кайра иштетүүнү өнүктүрүү, текстиль өнөр жайын кеңейтүү, мөмө-жемиштерди кайра иштетүү, ошондой эле биргелешкен өндүрүш чынжырын түзүү жана соода-экономикалык байланыштарды чыңдоо маселелерин талкуулашты.

Өзбек маалымат каражаттарынын маалыматы боюнча, Өзбекстан менен Ооганстандын ортосундагы соода жүгүртүү 2026-жылдын алгачкы эки айында 298,4 миллион долларга жеткен, бул 2025-жылдын ушул мезгилине салыштырмалуу 8,2% га көп.

Сүрөт: Тавазон