Душанбе, 29 июл, – АИ «Корвон Иттилоот». Ҳайати ҳукуматии Ҷумҳурии Тоҷикистон таҳти роҳбарии Вазири кишоварзии Ҷумҳурии Тоҷикистон, ҳамраиси Комиссияи байниҳукуматии Тоҷикистону Беларус оид ба ҳамкориҳои тиҷоратию иқтисодӣ Қурбон Ҳакимзода дар доираи сафари корӣ ба Ҷумҳурии Беларус дар маросими гузоштани гулчанбар ва гулҳо назди Оташи ҷовидони Маҷмааи ёдгории «Қалъаи Қаҳрамони Брест» иштирок намуд.

Маросими бошукӯҳ 28 июл баргузор гардида, яке аз чорабиниҳои муҳими барномаи сафари ҳайати Тоҷикистон ба шаҳри Брест маҳсуб ёфт. Иштирокчиён бо як дақиқаи сукут хотираи ҳомиёни қалъаро гиромӣ дошта, ба қаҳрамононе, ки дар солҳои Ҷанги Бузурги Ватанӣ ҷони худро нисор карданд, эҳтироми амиқ изҳор намуданд.

Пас аз анҷоми маросим ҳайати Тоҷикистон бо таърихи таъсиси маҷмааи ёдгорӣ, осорхона ва дигар мавзеъҳои хотиравии марбут ба дифои қаҳрамононаи Қалъаи Брест шинос гардид. Ин ёдгорӣ яке аз рамзҳои шуҷоат ва устувории халқҳои собиқ Иттиҳоди Шӯравӣ ба ҳисоб меравад.

Боздид аз маҷмааи ёдгорӣ садоқати Ҷумҳурии Тоҷикистонро ба ҳифзи хотираи умумии таърихӣ, арҷгузорӣ ба ҷасорати насли ғолиб ва таҳкими робитаҳои дӯстонаи башардӯстона бо Ҷумҳурии Беларус бори дигар таъкид намуд.

Ин чорабинӣ ҳамзамон бо баргузории ҷаласаи 19-уми Комиссияи байниҳукуматии Тоҷикистону Беларус оид ба ҳамкориҳои тиҷоратию иқтисодӣ сурат гирифта, дар он масъалаҳои рушди ҳамкориҳо дар соҳаҳои саноат, кишоварзӣ, сармоягузорӣ ва робитаҳои байниминтақавӣ баррасӣ мешаванд.

Пайвастани эҳтиром ба мероси таърихӣ бо рушди ҳамкориҳои иқтисодӣ аз хусусияти шарикии Тоҷикистону Беларус, ки бар пояи эҳтироми мутақобила, эътимод ва манфиатҳои муштарак бунёд ёфтааст, шаҳодат медиҳад.

АКС: Сафорати Ҷумҳурии Тоҷикистон дар Ҷумҳурии Беларус