Душанбе, 05 август, – АИ «Корвон Иттилоот». Ҳайати ҳунарии Ҷумҳурии Тоҷикистон дар ҳайати гурӯҳи «Моҳирон»-и Консерваторияи миллӣ дар Фестивали байналмилалии мусиқии «Young Euro Classic 2026» иштирок дорад.

Гурӯҳ дар бахши FUTURE NOW – Musical Diaries (фестивал дар дохили фестивал) иштирок мекунад. Барномаи онҳо омезиши мелодияҳои анъанавии тоҷикӣ аз минтақаҳои гуногун бо асарҳои байналмилалӣ (Вивалди, Монти, Зекиня де Абреу ва ғ.) аст, ки дар созҳои миллӣ иҷро мешаванд. Инчунин асарҳои аслии узвҳои гурӯҳ (Идибек Тошев, Ҷовидон Ҳасанов) низ садо медиҳанд.

Фестивали мазкур аз 31 июл то 6 августи соли 2026 дар шаҳри Берлини Ҷумҳурии Федеративии Олмон баргузор мегардад.

Иштироки мусиқиёни ҷавони тоҷик дар яке аз форумҳои муҳими мусиқии классикии Аврупо ҳузури афзояндаи мактаби иҷроии миллиро дар арсаи байналмилалӣ таъкид мекунад. Чунин лоиҳаҳо ба мубодилаи фарҳангӣ, рушди касбии ҳунармандони ҷавон ва таҳкими робитаҳои инсонӣ байни Тоҷикистон ва кишварҳои аврупоӣ мусоидат менамоянд.

Young Euro Classic — фестивали байналмилалии оркестрҳои ҷавонон аст, ки ҳар сол дар тобистон дар шаҳри Берлин (Олмон) баргузор мешавад. Он яке аз муҳимтарин платформаҳои ҷаҳонӣ барои мусиқиёни ҷавони анъанаи мусиқии классикии ғарбӣ маҳсуб мешавад.

АКС: Маркази матбуоти Вазорати фарҳанги Ҷумҳурии Тоҷикистон пешниҳод гардидааст