Душанбе, 07 сентябр, – АИ «Корвон Иттилоот».  Дар маркази маъмурии Вилояти Мухтори Кӯҳистони Бадахшон ба муносибати 35-умин солгарди Истиқлоли давлатии Ҷумҳурии Тоҷикистон роҳпаймоии оммавии идона баргузор гардид. Дар ин чорабинӣ беш аз 15 ҳазор нафар сокинони вилоят иштирок намуданд.

Роҳпаймоии идона бо иштироки раиси Вилояти Мухтори Кӯҳистони Бадахшон Шарифхон Нураҳмад Сафарзода баргузор шуд. Намояндагони қишрҳои гуногуни ҷомеа — собиқадорон ва сокинони калонсол, ҷавонону занон, варзишгарон, омӯзгорону устодон, донишҷӯёни муассисаҳои таҳсилоти олӣ, кормандони идораву муассисаҳои вилоятӣ ва шаҳрӣ, инчунин намояндагони сохторҳои қудратӣ дар кӯчаҳои марказии шаҳри Хоруғ ба роҳпаймоӣ баромаданд.

Иштирокдорони чорабинӣ бо Парчами давлатии Ҷумҳурии Тоҷикистон, аксҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва шиору овезаҳои ватандӯстона роҳпаймоӣ карданд.

Ба таъкиди масъулон, роҳпаймоии идона на танҳо бахше аз чорабиниҳои тантанавӣ ба муносибати ҷашни солгард, балки бозгӯи ҳамбастагӣ ва ваҳдати иҷтимоии сокинони Вилояти Мухтори Кӯҳистони Бадахшон мебошад. Иштирок дар чунин чорабиниҳо аз ҷонибдории аҳолии вилоят аз арзишҳои сулҳу субот ва ваҳдати миллӣ дарак медиҳад.

Барои сокинони ВМКБ 35-умин солгарди Истиқлоли давлатӣ аҳамияти хоси ҷамъиятиву таърихӣ дорад. Дар давоми солҳои соҳибистиқлолӣ дар минтақа як қатор ташаббусҳои иҷтимоӣ ва инфрасохторӣ амалӣ гардида, барои беҳтар намудани сатҳи зиндагии аҳолӣ ва рушди шаҳру ноҳияҳои вилоят замина фароҳам овардаанд.

Иштирокдорони роҳпаймоӣ ба роҳбарияти кишвар барои сиёсати созанда ва дастгирии давлатии минтақа изҳори сипос намуда, таъкид карданд, ки ҳифзи сулҳу субот ва ваҳдати миллӣ аз омилҳои калидии рушди минбаъдаи Тоҷикистон ба шумор меравад.

Ҷашни солгард ҳамчунин ба як фурсати муҳими ҳамгироии намояндагони наслҳои гуногун дар атрофи арзишҳои умумимиллӣ табдил ёфт. Аз насли калонсол то ҷавонон сокинони вилоят мавқеи худро нисбат ба истиқлолияти давлатӣ ҳамчун яке аз муҳимтарин дастовардҳои таърихи навини кишвар баён карданд.

35-солагии Истиқлоли давлатии Ҷумҳурии Тоҷикистон дар саросари кишвар бо баргузории барномаҳои васеи идона, фарҳангӣ, ҷамъиятӣ ва созандагӣ таҷлил мегардад.

АКС: Мақомоти иҷроияи давлатии Вилояти Мухтори Кӯҳистони Бадахшон